Karya: Win Ruhdi Bathin (WRB)
Diterjemahkan Kedalam Bahasa Gayo
Oleh: Aman Renggali
GERE ilen soal gaji ni wartawan siara wan wilayah konflik sigere sebanding urum resiko i lapangen. Salah muberitenen ipekaro roa pihak si ‘beperang”. Nyawa mujadi gere muarti.
Sesunguhhé aku lagu nge gere tereging. Den mumötusen teduh. Kebetapé kemanusieenku timul mien. Niet ini kukemasen kejeb den bebuet pora-pora wan berite Acih. Buge mugune. Sekaligus mungamulni sén demi mubeli mesin espresso si olok mal. Kerna Acih mujadi puset peredaren sén lagu kébo wan musim uren. Kenakku turah kutengkamen.
“Oyale salah satu keinginenku si gere ilen terwujudten”
“Ya, aku paham”, beles Alevtina urum léng lemutté. I jeripné kedet ni kupi cappucino é. Koboh ni susu lekat taring i bibirr atassé, dekat urum éyong.
Kenakku malé kubersihen. Tapé kutehen kenak niaté oya. Senyum mujém seseréngku. Salak ni Alevtina lagu mukerut pora.
“Hanati kedik?’, kené mungune.
Aku tamah kedik mugagak. Wé makin penasaren den teridah muheran pora. Kutilokken kutuyuhni éyongngé. Ijamahié urum jejarié den kona ku wih ni koboh susu si bercampur urum kupi, warnaé coklat mude. Gerené pötih.
“Nakal……,Win nakal…..masaen nuwet ni wih koboh ni susupé gere pas.
I hate you….”. Aku turun ari kursi, dedikké aku menuju ku becak.
* * *
Ari ló ku ló aku urum Alevtina lagu makin damal den makin akrab, gati kami beluh dediang murum. Lagu manuk merpati. Arawe mejen reroan kami munéngon metuh ni matanlo iyi iélopen i bagin barat Ujung Batee. Atawe munanti matan lo soboh i pantai Ulhee Lheu.
Wan biner ni cahaya ilang jingga si musermé ku upuh baju, rupe den wuk jema banan urang Rusia si bermata biru ini, aku lagu terpekona. Sangup ilen kutehen daringni matan ni laó silagu malé munyéut matante ike ipanang. Idélamié cahaya den warna-warna.
Sementara wé juge lagu betari wan biner ni cahaya. Gambaren gelep den terang ari rembegeé si mugegerak. Wuk narué mutetayang iemus-emus kuyu, demikien pule perupuhenné mukemang kécop i peperus kuyu ari panté. Muer bau harummé sawah ku utok ni ulu.
Aku lagu tengah iwan alam serge. Pesona keindahen alam sebagé bingkai den Alevtina mujadi fokussé. Gambar mörip si gere lepas ilukis. Dawat perasaenku kekurangen warna munerjemahné.
Rungké ni kekata-ngku gere mampu muggambarné. Kuyu mujadi alat musikké, lagu léngni saxopone (serongko) Kenny G, debur ni gelumangpé lagu muguel drum kin reroan kami. Sengeje kuluahen selop ari kéding, wépé sedemikien.
Munyentuh oné. Mubekasen tapak jejak. Iapus ni gelana. Kuukir mien. Osop urum wih ni koboh ni gelumang. Mulak mien wih oya ku tempatté. Ukiren bengissé mubekas relem, gip, hinge hampir 10 kilometer ku rah dereten.
Nge mari bencana silalu, kehidupen bermule mien. Urum warna ayu, bentuk ayu den jema-jema si ayu munosah nuansa berbeda. Sawahle ujung ni waktu jema banan Rusia ni.
Gere terasa, nge roa ulen Alevtina ara i Banda Acih ni. Wé nge paham olok daerah-daerah si belangi den tempat jajanan urum makanen i antero Acih.
Wan sara kesempaten, Alevtina mununger ni kenakké kati nguk dediang ku Takengen, sebelum ulak ku Rusia, kebetulen akupé nge roa ulen lebih gere penah ulak ilen. Meski gatiwe munelpon mungunei keber ni Ama urum Ine.
“Hanya sebulen miwe aku isien. Ulen arappo kasé aku turah ulak kerna waktu ni kami mujadi relawan tulu ulan we. Kenakké aku nguk dediang ku kutemu. Betul kedie dis urum gambar den ceritemu”, kené Alevtina.
“Ko gere pecaya urum sana singe kuceritenen, termasuk foto-foto si kukirim?”, kenaku mungune sesire mungerutten dahi, terséngung aku pora.
“Aku henye ingin munéngon langsung. Kerna ari foto si kirim koa, Gayo a lagu negeri dongeng. Apalagi lagu sana si nge iperinko, soboh lao kutemu osop isalupi emun”, jewebpé.
Murasa itantang, ku sanggupi sana si ipenteé. Henye seje mungkin Alevtina si payah pora mudemu ijin ari ketua rombongenné. Muninget jarak Banda Acih den Takengen, gere kurang ari 500 kilometer. Apalagi turah benomé pepien lao i wan situasi ni Acih si bendi ilen damé.
Alevtina muniro ku aku becerak kati demu ijin ari Michael, ketua rombongenné. Michael si icube iyakinni Alevtina tentang rencanaé beluh ku Takengen urum aku gere langsung pecaya beta pelin den munosah ijin. Alevtina menéro ku aku si berunger den muyakinni Michael. Teke ku sanggupi.
Ku Michael kujelasen situasi keamanen nge mari Memorandum of Understanding (MoU). Béwéné senjata nge igergaji den nge méh kerat due sehinge gere ara né senjata si taring, lagu si ijamin wan kesepakaten Memorandum of Understanding (MoU).
“Tapé kupengé ari pepien rakan si ara isien bahwa gati len terpengé léng ni bedil i pepien lokasi i Acih. Apakah ini berarti senjata ilegal delé ilen ara i deret so?’, pengunen Michael.
“Sesuei pejanyin, senjata i deret ni kuota si itentunen den nge méh iangusen, sahenpé pelakué akan ikonan urum pasal-pasal kriminal”, jewebku. Demi muyakin ni Michael ku gambaren pora kute-ngku siara i Dataran Tinggi.
I Gayo, masyarakatté olok heterogen, multi ethnik. Jep jema ihargei dis den sederejet. Jamu, olok imuliyen den ihormati. Kemulieen iéngon ari perbueten, nume cerak pelin.
I kute ini, jema akan ihargei sesuei urum sana si cerakné den ibuetné. Mubeda cerak den tindaken akan iéwitti jema den akan dihukum sosial urum “tipak dagu”. Kemampuen berpikir antara petani den pejebet dis. Tingket intelegensia berkembang sesuei urum geografis den jenis makanen jema urang pegunungen. Sehinge kin warga kawasen ini, penah ara istilah, “raja yang tak punya raja”. Gere ara kemulieen sesara jema ike wé kedepeten munafik. Gere dis sana si icerakné urum si i buetné.
Kebetapé, Michael muniro jaminen ari aku. Aku berdebat urum wé.
“No garanti”, kenaku.
Gere kubetih sana si malé terjadi kenge ulak ari sien, tegasku. Termasuk perihel kematien. Kerna Tuhan Allah, nguk bertindak i deret ni rencana den logika ni manusie.
“Tapé, selama Alevtina mujadi jamu-ngku, nyawa-ngku kin jaminenné”, kenaku ku Michael.
Ianguk-angukné kéngon ulué. Kerna kujeweb urum emosi pora, aku baro sadar ike Alevtina munamatni pumu kuenku urum roa pumué munenangen aku.
“Oke, oke. I believe you”, kené Michael menepok-nepok kerlangku den munosah ijin. Alevtina tersenyum, pun juge Michael. Ku salami Michael tene nero beréjin.
“Alevtina kuulakken mien lagu sana si érahko serloni. Gere sara jangutpé si ruluh”, kenaku berberakah sesire bacar renye beluh.
Pedehel kata-kata oya kuinget ari cerakni urang Gayo saat munosah jaminen.
“Ike nise kulit, naku rayoh. Ike nise rayoh, naku nyawa”, beta kédah.
* * *
Munikki armada L300, aku den Alevtina ulak ku Takengen. Kehadiren L300 sebagé armada angkuten nge munos bangkrut bus berbeden kul den naru. Béwéné angkuten antar Kabupaten i Aceh ikuasai armada ini.
Kami berangkat kelem ló. Aku gere muniro ijin ku kantur. Kerna biasaé payah mudemu ijin. Si penting berite jep ló setor ku redaksi. Aku nge muwanti-wanti rakan bebuetku mubagi berite.
Ari muloi berangkat ari Banda Acih, Alevtina lebih delé ongot. Wé mungaku mera we mabuk wan perjelenen. Ku saranen kowé ménum uwak antimo, den setuju. Pengaruh ni antimo si énommé setengah jem sebelem berangkat nge bereaksi. Teridah Alivita mutunuh. Ee ya, a nge keta.
Kebetulen Alevtina kunul i dekat jendela. Mengantisipasi ike wé peloah. Ari nikmi wé nge penomé den menyérén ulué ku kerlangku. Perjelenen aman hinge sawah ku Bireuen. Tapé malé mulewati Bireuen, perjelenen muloi mutetékong urum reris ni karang si relem. Terutama i daerah Görilen.
Udara porak mubah bengi, apalagi ike nge mayo ku arah perbatasen kilometer 35. Setelah Cot Panglimae. Alevtina jege, nengoné sejukken. Ku uweten jéket ni Alevtina ari atas ni ransellé. Sebelummé memang nge kuperin kowé kuyu i Takengen olok bengi den perlu jéket.
Nge mari selukné jéket, dabuh Alevtina ni lagu malé peloah. Kusiappen tas plastik kucak. Betul seje, peloah wé den munangköhen béwéné si nge ipangan den si énommé. Peloah lagu kul. Kubantu le pora-pora, kupepecik tangkollé kati ara murengang lagu si penah ibuet ni Ine ike aku peloah waktu tengah kucak. Waaakk. [] Bersemet…
Klik disini : Alivtina [1-5]
