Karya: Win Ruhdi Bathin (WRB)
Diterjemahkan Kedalam Bahasa Gayo
Oleh: Aman Renggali
TÉMUL borjuis ayu sibatas jelas urum kaum proletar i Acih. Jurang pemisah si relem. Sementara pemerintah daerah gagal munos sumber keuangan ayu bagi Pendepeten Asli Daerah (PAD). Kecuali henye bergantung ku Dana Alokasi Umum (DAU) den Dana Alokasi plus Otsus. Munusu den terus munusu.
Hasil bumi ni Acih si eksport turah mulewati Sumatera Utara si mujadi daerah persingahen kin eksport. Sumut meraup delé ringit ari Acih. Demikién pule kebutuhen sembako hinge bahan bangunen serta kenderaen. Béwéné berbau plat BK.
Sejarah emas ni Acih i masa lalu igantin pengisi sejarah ayu si berorientasi sén den haus kekuasaen. Berjamaah munebar cara den pakat mugunen sén ni negara secara syah kin kelompok den ataupé kin sesara jema.
Rakyat, mujadi kin lelangkahen pelin. Rakyat, sébuk kune mubangun ekonomi setelah ihancurni pelitik Acih si bau rayoh. Sébuk mubungker tanoh si i témuni kerpé den kayu kuel munyuen kupi, berempus kupi. Atauwe munyiepni gorengen mujadi pedagang.
***
Pepien bulen silalu. Sara panggilen telepon sawah ari Ama. Aku sunguh terih. Gere biaseé Ama munelpon ike gere ara hal si penting den wajib. Pasti ara sesuatu si penting den kul. Beta kené wan pikirenku.
Ama mungini aku ulak kerna ara hal penting si turah isawahné. Lemem aku bepikir sire muduga-duga hal sana die si malé isawahni Ama ku aku. Soal warisen, lagu gere mungkin. Sana kati gere isawahné wan telfon padéhé ge?
Aku gere berani munulak ike nge Ama si becerak. Apalagi munéngon kumataé silagu matani manuk kalang. Munemus ku ulu naté. Menghakimi sebelem pepalu itukul. Akupé ulak. Nge mari mangan soboh, kami kunul tetulun kami. Kunul semile den Ine petémpuh.
Menu mangan sobohni terasa nikmat den sedep olok. Sunguh tradisional Gayo. Cecah agur urum empan. Ara dememir masam jing itamah mien urum terpok den gantang urum depik kering. Ine woow, enta isihpé pemanganen i restoran boh. Rasa kebes ni empan terasa ilen ketike Ama munuke cerak munyawahen sana si ipenteé.
“Begini Win. Kam sepuluh bewéné besudere. Abang urum engimu serta aka-akamu bewéné nge méh i luahi. Taring ko seréngmu miwe simujadi kewajiben ni kami Ama urum Ine-mu. Kuliahmu nge selesé. Buetmupé nge ara, walaupé nume pegawé negeri”, kené Ama sesire munemusni asap ni rokok kretekké.
Berrrrrrrrrrrrr, até-ngku mugerak mumahami maksud sana si cerakni Ama. Aku petungkuk ilenné gere berani mumanang ku arah Ama si leluasa menyenter kami. Aku den Ine. Ama menyiremi kami urum panangenné lagu rentéten senjata laras panjang penosni Rusia den Pindad oyawa si gati kupengé urum jarak dekat.
Meski perokok berat, tapé ike iarapni Ama aku gere berani menutung sara batang rokokpé, walaupé kenak naténi kenaké munisep bako belinting.
“Aku urum Inemu, nge sawah panggilen Allah SWT ku Tanoh Suci. Kegere muhali tun ini, Insya Allah kami berangkat urum doa ni kam béwéné anak-anakku.
“Jadi, belam beloh kenaké ko nge kami luahi Win anakku”, kené Ama urum ling tegas den sunguhhé.
Aku gintes. Rupe ni Alivtina tibe-tibe lagu mugambar jelas iwan ulungku. Amapé begerak berangkat ari ton kunullé, aku mantong petungkuk ilenné. Taring aku urum Ine miwe.
“Noooo, bening sana kin oya Win”, kené Ine mumerusni ulu-ngku. Akh..Ine dor ara wan aku kona masalah. Bahkan tengaha, aku gati nomé ipenompét ni Ine .
Kurebahen diri-ngku ku penompit ni Ine. Ine paham ike kenak ni Ama lagu mukekarat pora. Munurut Ine, sebelummé Awan Alik si malé munyawahni hel ini. Tapé Ama terih aku munos cara urum berbagé alasen. Kerna oyale Ama mungini aku ulak ku tanoh Gayo.
“Kune pongmu si ari Rusia mané Win?”, Ine mungune seulah betihhé aku ara begalak den perasaen kin Alivtina.
“Gere kubetih ilen Ne. Seni wépé nge ulak ku kampungé. Cuge kukunei mulo kasé Ne”, kenaku lagu gere yakin. Ine pé ongot pebening. Sengap, lagu gere meling sanahpé ari kerna beningngé.
***
Batas waktu si singket si osah Ama munos aku gabuk mubilangi lao. Turah iluahi sebelem Ama den Ine nik aji. Kerna kené Ama, wé gere mera mubetéhi apakah i tanoh suci kasé iosah Tuhen ilen ulak atawe gere. Kerna mörip ni Tuhen si munentunné. Kerna oyale Ama mudesak aku iluahi sebelem menunaien ibadah aji.
Si terlintes iwan pikirenku adalah mungeberen tentang hal ini ku Alivtina. Tapé aku juge ragu, apakah wé nguk mumahami den munerimeé. Gere ara kepastien, sebelem kusawahen. Kutulisle sara suret naru kin Alivtina.
“Salam..
Alivtina, suret ini kukirim setelah aku ulak ku tanoh Gayo. Ulakku si mudadak pora kerna Ama mungini aku ulak den munyawahen hal si penting den berat. Ine mungirim salam kin ko si isebutté urum kelimat ”Beberu Mampat Belangi Ari Rusia”. Beautiful Woman from Rusia.
Alivtina, aku gere pané menungkep ni kata mujadi rangkaien kalimat penuh makna. Si aku pas hanya munyawahni sara fakta. Tentang kenakni Ama. Ama bekenak aku iluahi sebelem beliau mununeien ibadah aji.
Bur Gayo adalah saksi ari perasaente reroante. Tapé lagu si penah kuungkepen, cintaku sepenuhhé baro akan nyata setelah pernikahen. Gere ara jema banan lén, si kuinget urum perasaen selain kao Alivtina.
Ikoten perasaente memang gaib. Gere nyata. Tapé ara kepercayaen iyoné. Lagu noya Ama munéro ku aku munikah, si tergambar iwan ulu-ngku hanya rupemu. Tulu bulen ku arap Ama urum Ine turah berangkat nik aji.
Berarti ara limit waktu sekiter roa bulen kin waktu persiepen munikah. Bersedieke engingku kin ton umahku den kin Ine ni anak-anakku puren?”.
Oya kalimat penutup. Den kukirimle email oya. Kunantin belesen email den reaksi ari Alivtina urum até gunah. .[] Bersemet…
