Free songs
Home / Sastra / [Novelet WRB] Alivtina [14]

[Novelet WRB] Alivtina [14]


Karya: Win Ruhdi Bathin (WRB)
Diterjemahkan Kedalam Bahasa Gayo

Oleh: Aman Renggali

LANG néa mayo email ari Alivtina. Ara perasaen lagu mudegub dedengku ketike mununke email oya. Ini soal perasaen. Gunah seulah sawah gere terbebelei. Lemen kubaca jep kata-kataé. Teliti aku membacaé den mumaknaié urum bahasa Inggrisku si lagu mupacah ilenné.

Kucube menerjemahné sesire munuke google translate, meski makna terjemahenné sigatinné lagu gere bersikonan. Tapé aku pehem maksudté. Begini isi suret ni Alivtina wa.

“Kin Win i Acih

          Mubaca suretmu, aku gerle. Demalah. Kerna gere kuduga teniron betempat atawe iluahi ariko géh tibe-tibe. Enta mukune nge, luh ni mata-ngku mujaril gere terpitet. Mubayang saat kite reroante i Acih den i Gayo. Mubayang ilenné i kemiringku, nik becak reroante i ringi urum lagu dangdut Roma Irama si berjudul pengembaraen.

          Aku memang gere pehem den gere terbiasa urum musik dangdut. Tapé makna si iterjemahko lepas kupahami. Pengembaraen sara manusie.

Pengembaraen memang delé den simen tantanganné den ending-ngé si kite gere betih kune de ahéré. Sabé lagu ara dor kejutenné.

          Pengembaraen i denie maya juge si mujadi jelen aku mudemu urum kam. Mujadi pertemuen nyata si menyenangkan. Mungkin ini pengalamen terindah wan móripku. Makna mórip tengah wan kaji ilen wan pemikirenku, demikien soal religi.

          Seni ara kebebasen beragama i Rusia. Bahkan i Zelenodolsk nge ibangun sara mesjid. Ménét rasaé aku tir koné den betempat urum kam. Tapé tentu gere semurah oya kenak ni até.

          Iperlun den simen belenye kati lepas sawah ku kutemu Takingen. Gere ilen proses lénné, lagu muminahni kewarga negaraente den sejumlah persoalen si lén. Aku mera Win. Tapé, saat ini gere genap belenye berupe péng.

          Win, betapa bahagiaé aku ike sempat betempat atawe berumah tenge urum ko. Tapé soal waktu, sunguh aku gere lepas ilen. Aku tengah munyube belejer tentang agamamu. Sebelummé, tun arappo ike nge genap tabungenku kasé kenakku ulak mien ku Takengen, saat isien tengah musim salju.

Tapé oya gere mungkin mien lepas kubueten kerna kam  turah tir betempat demi mubahgienen Ama. Kupastinen aku gere ilen betempat urum ko saat seni. Win, kite turah muhedepi kenyataen ini.

Ikoten jema tue den anak demikien kuet isoné. Aku percaya kam sunguh bekenak mubahgianen Ama urum Ine. Den oya indah sekali. Betapa berartié mórip saat kite mampu berbuat sesuei keinginen jema tuente. Den aku percaya ara kemulyeen iyoné.

Win, penuhimi keinginen den kenak ni Ama urum Ine. Bahgienen paké si roa wa. Nge genap senang naté-ngku nguk mudemu urum ko. Ongot-ongot simen hal si kupelejeri ari ko. Termasuk tentang cinta tanpa sentuhan den ciumen. Juge tentang keindahen budi den perasaen.

Nge réla aku kin beluhmu ari aku Win. Gere ara bekas negatifmu ku perasaen den fisikku. Aku percaya cinta si lagu nini jeroh den belangi. Enta mi ike nge betempat kasé.

Meski berat aku muluahenmu. Walau ko gere kumiliki secara fisik. Tapé nume secara perasaen. Lepas ilen kukemasen perasaenku kin ko selama aku sangup.

Salamku kin  Ama urum Ine

Your Lovely

Alivtina

Suret ni Alivtina meski berisi kepastien muluahni aku, tapé lagu olok berat rasaé. Normal, aku bekenak lepas betempat urum wé. Tapé ruang den waktu serta belenye mujadi pemutus kenak oya. Kukemasen king kenangen urum Alivtina, hinge Ama urum Ine berangkat menunaien ibadah aji, aku gere ilen betempat. [Tamat]

Paya Tumpi , Maret 2013.


Baca Novelet Alivtina lengkap disini :

– Alivitina [1]
– Alivitina [2]
– Alivitina [3]
– Alivitina [4]
– Alivitina [5]
– Alivitina [6]
– Alivitina [7]
– Alivitina [8]
– Alivitina [9]
– Alivitina [10]
– Alivitina [11]
– Alivitina [12]
– Alivitina [13]
– Alivitina [14]

Comments

comments

Install Lintasgayo for Android Smartphone

Comments are closed.

Scroll To Top