Karya: Win Ruhdi Bathin (WRB)
Diterjemahkan Kedalam Bahasa Gayo
Oleh: Aman Renggali.
Möripni terasa berat isien ike gere ara mubuet. Barang-barang kebutuhen béwéné mal. Oyale sebeppé berumah tenge mujadi hal si sulit ibueten isien. Simen jema si gere berumah tenge sawah méh umurré.
Munisi waktu léburen den mumérah tempat ton dediang i deret ni Rusia, merupakan semacam ‘ibadah’ si wajib ibueten. Hanya saat léburen le saat si indah den inenantin. Selebihhé adalah rutinitas si munos suntuk sepanjang tahun. Kecuali musim salju, segele buet den aktivitas wan waktu ini béwéné teduh mangan sana siaramiwe.
Biasaé i musim salju inile léburen atawe waktu peré beluh ku negara lén si gere ara mumusim salju lagu kawasen Asia. Imusim salju, kebutuhen mörip pora lebih delé kerna turah munöripni penérun jeb waktu.
Win, aku pecaya bahwa ara rasa nétemu kin aku. Aku pecaya oya. Matamu gere akan penah pecogah den munipu. Sunguh aku bahagie mubetihi oya. Apalagi kemudien ara pengakuenmu perasaenmu si dis urum sana si kurasa. Enta mukune, meski gere munyentuh rembegengku, aku murasa senang den damé”.
Pemuloé kubayangen akan mudepet ölik urum kecupen sayang ari ko. Meski gere penah kurasa, tapé ara keindahen rasa i yoné. Ku cube memahami hel oya meski muloé aku olok kecewa. Tapé penjelasenmu tentang cinta si pahamiko, sungguh olok mubeda.
Win, aku lupe, apakah aku nge mumerin kul naténgku kin ko. Aku gere perduli mupienen nge ku ungeren. Aku memang begalak até kin ko. Meski secara fisik ko gere kumiliki. Tapé secara perasaen, aku murasa kam nge mujadi bagien iwan möripku.
Win, aku penah mumengé ungkepen cinta gere turah mumiliki. Apalagi kite ipisahni ruang den waktu. Tapé akupé ménét oya béwéné semperne. Cintamu ingin kumiliki, kamu harus kumiliki. Oya tekadku. Tapé gere kubetih kune caraé, tapé ara kenak naté si kul kin oya.
Saat seni aku tengah gabuk den pemacik. Aku terkooptasi ilen antara kebiasaenku urum pemahamen den kebiasaenku. Aku belejer den munyube munuke ruang kin oya. Ruang si lebih mumulon perasaen den hel si gere rasional.
Win, aku tengah i internet cafe seni, gere gip ari tonku bebuet. Menuke den munéngon foto den béwéné hel tentang Acih den Gayo. Takéngen, kutemu memang indah. Like a paradise. Gere delé kute si dis lagu kutemu. Penduduk iyoné tureh berkomitmen kune mujege den mulestarinenné.
Kupimupé sedep. Meski aku nume pecanu kupi, seni aku muloi mera ménum kupi. Ara ilen tenason stok kupi si kuemah ari Gayo, gati kami ménum urum wine Rusia. Denem den rinungku kinko”.
Alivtina
Suret elektronik ari Alivtina wa sungguh olok munos aku bahgie. Bahgie kerna kuduga Alivtina nge munetus ni hubungenné urum aku kerna cintaé kutulak urum sebeb tertentu. Tanpa peluk cium den uraian kata indah, lagu sideléné jema si tengah munyang baléh atawe kasmaran.
Meski aku siep kin kata-kata mupisah, ketapé sesungguhhé aku nge penah begalak até kin wé. Urum cara-ngku. Mejen aku lagu terih sediken jema banan siberkulit putih urang Rusia si wukké itam kelat ni osop ari mata-ngku. Ku sadari bahwa perasaenku muloi mugalakkié. Mubayangen kedik den pepien keistimewaen banan urang asing ini. Cara ni mataé munéngon ku aku gere mugegedép.
Apalagi aku merawe mumanangi fotoé si kucetak 24 inchi ketike Alivtina i Bur Gayo urum jilbab tipissé, sehinge teridah Alivtina wa lagu jema banan urang Arab si berjilbab. Foto oya kucetak munyamping urum éyung ni Alivtina teridah lebih mancung kuarap.
Aku berharap den berdo’a, Alivtina “mubah”. Hinge aku lepas muwujudten kasih den sayangku kowé secara halal. Kenakku mubuktinen bahwa cinta baro nguk iterimeé penuh ike nge mari ijab qabul. Apalagi Ama den Ine demikien pemacik até kerna umurku nge mampat bang berumah tenge.
Gere ilen uwuk keriting, jampang den gomis i dagu-ngku si kudatén naru kindirié gere berurus.
“Ino Win, lagu nge tulu anakmu ike lagu noya. A kati gere merapé jema urum ko Win !”, kené Ine sara ketike. Aku pesenyum pelin ku Ine. Jema banan si seber, si gere penah bengis bierpé sepuluh anakké sangup ikuliahné urum gajié sebagé guru.
Akupé ninget ilen kin cerak ni Ama si parlente, meski nge pensiun ari Pegawai Negeri Sipil urum sepatu potihhé si siep do pesemir.
“Win, gelah stedi pora yah !”, kené Ama. Tapé aku lebih galak sana araé. Kerna menurutku si paling penting adalah sana si ara itoyuh ni wuk den sana si ara i sebalik ni rupe.
Perbedaen ruang den waktu-ngku urum Alivtina, munos suasana henye terbangun berdasarkan imaginasi masing-masing. Aku berimaginasi, layakké imaginer. Aku tentu seje lepas mubayangen keseharien ni Alivtina ari uwet hingé nomé mien berdasarkan ceriteé si kukonstruksinen.
Keadaen ini tentu seje bernilai positip kerna aku murasa dekat urum Alivtina. Gere kubetih apakah Alivtina juge lagu noya. Isisi lén aku juge munekuni denie jurnalistik si salah satu syaratté rela bebuet sabé iwan tekanen. Waktupé berlalu. Roe denie.
Kelem muganti. Poraklopé sawah. Bahasa rotasi waktu gere delé si mubah. Gere ara kejadien si luar biasa setelah bencana Tsunami, kecuali Rehab den Rekon urum dana pinyemen ari asing si berarti utang, munajur lagu wih ku Acih ni.
Bahkan dana triliyunen ari Anggaren Pendepeten den Belenye Negara (APBN), simen si kemudien turah iulakken ku puset kerna gere panétu murancang kegieten den mugunenné. Euphoria politik ayu ala Acih mujembuel. I saat gere ara jelen mujadi ‘reje’ i Acih, icetusen le perté lokal den calon independen.
Pergeraken politik senjata urum mujuel nyawa den rara igantinen style ayu. Orasi basi mengobral janyi den kata-kata mutiara. Strategi gerilya muganti urum kepanén bersieset, bermufakat urum kekueten jaringen kelompok hirarki sebagé jaringen komando. Bahasa diplomasi.
Menikot cara munayon tube kepentingen iwan sistim den akses ringit imuloi. Munusu ku Anggaren Pendepeten den Belenye Negara (APBN), Anggaren Pendepeten den Belenye Acih (APBA) den ataupé Anggaren Pendepeten den Belenye Kabupaten (APBK). Cara legal mumanfaat ni keuangen negara, urum den atas nama. Lahirle reje-reje kucak ayu lagu artis urum berbagé kemewahen den aksesoris denie berlabel agama.[] Bersemet…
