Karya: Win Ruhdi Bathin (WRB)
Diterjemahkan Kedalam Bahasa Gayo
Oleh: Aman Renggali.
BIER kunehpé, gere mungkin beta pelin ike ulak ni Alivtina ni gere kujule den kuéngon. Walaupé aku gere yakin kuet muluahné beluh ulak ku negeraé, setelah munungkep kul den galak niatéwé kin aku. Entap ni oya bang sehinge wé miniro entimi né mudemu. Kukilesen kenak naté éa.
Betul seje, rombongen Palang Merah Rusia malé berangkat ulak. Sara pesawat militer Rusia nge siep malé temerbang, hampir seje aku gere sempat mudemu urum Alevtina. Rombongen ni pakéa nge méh mayo kowan ruang tunggu Bandara.
Puer aku berusaha mungenali isi die Alevtina ni. Kucube munelponné, mayo. Ketapé gere ara jeweben. Mugabuk pora aku obohé, bengis kedie wé ge? Atawe memang gere ikenakié néh mudemu urum aku. Gabuk. Saat berusaha mungontakké mien kebetulen Alivtina tangkuh ari sara toilet i Bandara wa. Thank God.
Ikelokné bébpé den berusaha munuetni telponné.
Saat wé mumerin “Halo…..!”, pas aku nge pesesuk iarapné. Kami bersiéngonen. Mokot olok hinge aku berusaha munguasai diri.
“Teleponné morip ilenné”, kenaku
“Oh iya”, ungkep ni Alivtina sesire munempotné
“Ngeke baca kam emailku?”
“Iya”
“Win, aku terih mudemu. Den gere aku kuet mupisah”, kené Alivtina
“Akupé beta. Tapé ara si malé kuosah kin ko, sebagé tene bahwa kam penah sesuk i tanoh ini. Den pertemuen ini nume nipi”.
Sara rilah syal berukir kerawang Gayo kuserahen ku Alivtina. Teridah wé lagu gere mugerak, demikien juge aku. Kujurahen pumungku malé mat jari. Lemem sire petungkuk ijangkonné pumungku. Lemut olok tapak ni pumué.
“Akupé gere bekenak mungucep “selamat berpisah”, kerna aku juge bekenak sara saat kasé kite mudemu mien”.
“Win ngukke aku menciummu, seger ni dih?”. Hampir seje ku o nen.
“Sijerohé enti. Ike ko gere berkeberaten, pumungku padéhé lagu saat kao munecum pumu ni Ine”, kenaku. Sekejeb seketike mu ubah siremni Alivtina. Te kune malé, ini soal perinsip.
Kebetapé Alivtina munecum kuduk ni pumungku sire munungkuken ulu. Ara pepien tenting luh ni mataé teridah mujaril lagu mutiara metuh ari sagi ni mataé taring i kuduk telapak ni pumungku. Aku mugegir. Den tibe-tibe kupengé lingni kamera.
“Krek..krek…”, rupenné Michael mumoto kami. Muabadin momen perpisahen atara aku urum Alivtina. Ari gegir sikurasanen akupé gintes den munyadari diri.
“Time to go!”, kené Michael den munegun pumu ni Alivtina beluh munuju ku ruang tunggu Bandara. Ternyata béwéné anggota rombongen Palang Merah Rusia nge méh begerak, taring akumiwe urum Alivtina den Michael.
“Kejeb, nantin!”, kenaku lagu mutuk keras tanpa kuasadari. Reroanné teduh sire néngon mubalik ku kuduk.
Aku remalan mudekat, munuetni syal ari pumu kuen ni Alivtina kemudien munyelukné ku rongokké.
“Beluhmi kam Alivtina !”
Luh mata ni Alivtina si sine metuh ku kuduk ni pumungku osop. Bekassé miwe siara lagu mubasah. Mata birué lagu mutanom kowan jantung limpengku.
* * *
Sejemat ari ulakké ku Rusia sara suret elektronik kuterime ari Alivtina, alivtina@mail.ru. Nge kuduga sana si malé isawahni beberu berpostur sedang den beréyung mancung ini. Wé malé mumerin bahwa terlalu rumit urum aturen hukum ari keyakinen si amat king. Kerna gere lepas munung kenak ni nesu atas nama sanahpé. Cinta terhalang keyakinen. Sehinge gere demué peluk den ciumku.
Nume cinta si biasa den gere menarik. Tapé dugaenku meleset gip. Suret oya demikien belangi isié den penuh makna. Tentang awal sara pemahamen den kesadaren. Inti ni suretté kire-kire lagu nini;
“Win, saat kite murum adalah saat-saat si paling indah wan moripku. Muloé demunte lagu nipi. Tapé nyata. Menurutmu oya adalah takdir den ara kekueten si Maha Kuasa i kuduk ni skenario sana singe terjadi a.
Sebelummé kubayangen mudemunte akan mujadi sesuatu si indah den penuh cinta. Reroante wan sengap den bebas malé ngunehpé si kite galakki. Menurutku oya adalah cinta. Meski oya gere kudepet, tapé aku simen mudemu hal ayu. Si selama ini luput ari perhatin, pemikiren den perasaenku.
Nume tentang cinta pelin tapé juge kekayaen makna si gere teridah ari si ara. Aku belejer tentang hakiket. Mile Win, aku murasa terkadang béwéné mucampur ilen mujadi sara.
Aku mungune ku bapak tentang geral Ruslan den keyakinen bapak sebelummé. Menurut bapak, saat tengah kucak wé belejer ilen tentang Islam ari kakek si mujelenen seriet. Tapé aturen pemerintah Rusia Raya kala oya mularang jep keyakinen kecuali komunis. Ijep negara bagienné si kemudien pecah mujadi negara masing-masing.
Bapak inget ilenné pepien ayat i wan memorié. Ketike aku munyebut tentang hubungenku urum ko si beragama Islam, bapak munyerahen sepenuhhé pilihen oya ku aku. Tapé ibu munulak den murasa berat ikepé turah mupisah urumwé. Nume soal agama. Kerna agama isien hanya iwan catéten pelin, gere ilaksananen. Den gere masalah urum oya.
Ibu mubayangen kune morip i deret ni Rusia. Urum kebudayaen hinge pemanganen simubeda. Até ni Ibu macik olok. Bahkan ibu sempat mongot. Kuperin ku ibu bahwa oya béwéné ceriteé ilen den aku séni murum ilen rum ibu isien. Ibu tersenyum den munolik niaku. Seulah gere ileluahné.
Win, cinta si kupahami sunguh mubeda urum bahasa cintamu. Cinta den kasih sayang henye ara setelah munikah. Sementara isien, ike nge ara kecocoken sanahpé nguk ibueten. Termasuk morip murum den ara mukekanak tanpa ikoten.
Isien, kami terbiasa urum morip sesuai kenak den akal. Agama gere mayo wan ranah ini. Selama perbueten oya gere mugangu jema lén, biasaé gere ara si peduli. Minum-minumen keras adalah kebiasaen den gaya hidup.
Akupé gati minum, meski gere sawah mabuk berat. Perayaen sabé iwarnai urum minumen keras den sex. Lagu si penah kuceriten bahwa delé rakan den pongku jema rawan si galak mabuk den gere bertanggungjeweb terhedep perlakuenné kenge mabuk.
Sunguh aku gere galak kin selelagu n oya. Kenakku morip normalwe. Berkeluarga, mukekanak den masa depan si jelas. Meski pemahamenku tentang morip den cinta mu ubah setelah mudemu urum kam. [] Bersemet…
