Karya: Win Ruhdi Bathin (WRB)
Diterjemahkan Kedalam Bahasa Gayo
Oleh: Aman Renggali
MENCÉR ni matan lo teridah lagu mupenilang mupantul ku syal ni Alivtina. Kumuloi mien munuke cerak. Pemanganen si gere ilen méh urum kupi kuédangen ku atas tumpukni ulung uyem si mubah kuwarna coklat akibet lemem nge ruluh ari batangngé.
Kugenyuren kiding, demikien Alivtinapé. Munyérén bedenné ku perdu ni uyem, kutebak batang ni uyem oya nge berumur puluhen tun. Kekayaen alam Gayo si gere sempat ilen imanfaaten setelah berbagé perusahaen hph kabang ibiyo konflik.
Reroan kami wan sengap, munerawang gip. Mulupenen jasad. Temerbang wan gasut ni gelumang perasaen mumérahi tepi gerewe rap kusakaten kerna gaibpé. Mata gerené mugune, si ara hanya rasa.
Hinge ling mujadi jelas. Baro indra penengénen munempati peranné. Ling deso ni uyem gambaren padang pasir. Gerico ni manuk jejok den pepeltik si ramah membumikan perasaen.
Ah…, aku den Alivtina ternyata ara i pucuk tanoh Bur Gayo ilen. Gere lepas kuterka kusi de beluh ni angan perasaen jema banan urang Rusia ini. Apakah menyusup ku uyetni uyem hinge buntang i Zeledolsky.
“Segeleé seni terserah ku kam. Sana si rasanko dis urum sana si kurasa. Tapé cinta sepenuhhé baro kuserahen den kuturuhen kenge kite munikah”, ucepku lemut sesire pecengang kowé.
“Turahke kutunung sana si mujadi keyakinenmu, sebelem oya béwéné terlaksana?”
“Iya !”
“Tapé, aku gere mera ko mumilih keyakinen oya kerna aku. Kerna cintamu ku aku. Atau alasen lén kune kati nguk murum. Tapé kerna kesadaren. Untuk oya, ara ilen waktu den kin bahan pemikirenmu. Mungkin termasuk bermusyawarah mulo urum keluargamu”.
“Alivtina, nume oya pelin. Kaopé turah berpikir kune morip i Acih kenge segeleé selesé, kenge kite kerje kasé. Perbedaen kebudayaen, morip, cara berpikir hinge mungkin soal pemanganen. Béwéné turah isesuaien. Kerna nguk seje oya mujadi persoalen ayu kasé ku kite puren. Kadang kasé ara sikenakkiko gere lepas kupenuhi. Kuatke kam kin oya béwéné ?”, ucepku berharap buge banan urang Rusia si renah rembuné ini betul-betul berpikir secara ilmiah tanpa ara beban perasaen.
Termasuk perasaen cinta si gati munos jema gerenéh berpikir ilmiah, ketapé ipenuhi urum emosi. Emosi perasaen den cinta sehinge mulupenen fakta setelahhé si mungkin terjadi. Baro munyesal kemudien.
“Apakah ini sara tene penulakenmu Win?”
“Gere lagu noya, kao salah Alivtina. Aku gere munulak, kuterime dirimu den bahkan ike mungkin mujadin ko kin ine ni anak-anakku puren. Kati cintamu den cintaku semperne, kati galakmu den galakku musampé iwan ikoten suci berbentuk pernikahen. Halal !”.
Mari oya béwéné sengap.
“Oke beautiful. Let us back home”, kenaku.
”I don’t know Win. Everything feel so hard”, jeweppé.
“Seberat sanahpé, gereke né ara senyum kin aku?”, senengku. Alivtina tersenyum.
“It make world better”, kenaku mien sire mumerusen wukké.
Kemudien aku sesuk ecek-ecek malé musangka, den Alivtina mununung mudedik aku ari kuduk. Ulak remalan mulewati keindahen Bur Gayo si engkip urum batang perdu ni uyem.
”Win…………………….!!”, tuk ni Alivtina löting.
* * *
“Win .Waktungku nge sawah, aku turah ulak. Tulu bulen si indah den akan kukenang sepanjang moripku. Gere kubetih sana si akan terjadi nge mari ini. Sanahpé oya, aku akan bahagie urum kenangen siara.
Ramah urum ko adalah sara miracle. Sebelummé kuanggap hal oya lumrah seje terjadi. Seni gerené, aku pecaya ara kekuasaen ni Tuhen iyoné. Mudemu secara gaib den mupisah urum nyata. Sakit olok rasaé.
Aku munyalahni waktu. Sana kati turah ramah den kenal urum kao ike turahwe mupisah. Sunguh aku begeli até kin perpisahen si lagu nini. Merenggut kebahagieen si kurasanen. Tapé kukunehen malé, kite ipisahni ruang den waktu.
Gere kubetih, lang kasé kune die. Gere mera néh aku mumikirié, kecuali menghadapié mi we. Tapé aku pecaya, masa depan nguk i rancang. Enta dis skenarioé, aku murancang masa depanku urum kao. Mubayangen morip murum. Indahé gere terbayang naku.
Win, ike aku ulak kasé, kutiro ijin ku ko, gere dalih juleko aku ulak. Lagu waktu ko murai aku ku bandara Sultan Iskandar Muda ketike aku sawah ku Acihni oyawa. Please. Gere sangup aku mumengé kata-kata “good bye” ari awahmu. Kutiro ijinmu.
Kata-kata oya, seolah kite gere bekenak mudemu mien. Aku terih kata selamat berpisah. Enta kune kasé aku akan sawah mien kuini. Atauwe kao si murai aku ku Zelenedolsky? ”
Salam Ari;
Alivtina
Suret elektronik ini ikirim Alivtina pepien saat ketike wé malé ulak ku negaraé. Gere ara smssé, pedehel akupé ara i kute Banda Acih. Aku terkesima, Alivtina demikien terih mupisah setelah ara rasa den pengungkepen kata cinta. Demikien akupé, munehenné juge gere mungkin selain mudatenné berangkat. Beluh.
Cinta ni kami juge gere jelas. Mikot urum sana?, kecuali munikah. Selain perasaen, masalahhé mera kedie Alivtina kerje urum aku kenge mari mungucep kelimet syehedet mulo. Kune de caraé? Oya si gere ara ilen jewebenné.
Atau aku si mungalah den ‘hijrah’ ku Republik Tatarstan?. Kucube murerangké berbagé kemungkinen. Tetap we gere ara kepastienné. Cinta berat i ongkos. Akh, daten dih waktu si muhakimié.
Alivtina sengeje gere mera munosah keber tentang selohen waktué ulak. Akupé kiset mu-smssé kerna ari perinné kata cintaé, aku jadi terih demu. Aku terih perasaen cinta ini munos aku terbawa perasaen si membuai.
Dibelai rasa, hinge melupenen tanoh ton mujejak den terbang ku langit atas nama cinta. Ike le logika den hukum hinge cinta berkalang nafsu. Cinta mujadi gere néh indah kerna nge inikmati sebelum waktué.
Cinta si seharussé baro i muloi, dabuh berakhir setelah ikrar. Semuanya hanya sisa, sisa nafsu si mubekas. Nume mumuloi cinta, sunguh aku terih kin diringku. Sanahpé ari sana singe kupelejeri den kuamalen ruluh béwéné iempas ni nesu wan hitungen menit atauwe jem seje. Den sesaat ‘keakuanku” lebur berkeping. Aku mujadi gerenéh muarti.
Tentu aku gere munerime beta pelin, meski Alivtina muresien lo sana waktu ulakké kasé. Kuperah informasi jadwal ulakké ku jep relawan urang asing i Puset Informasi Rehabilitasi den Rekonstruksi Acih.
Berkebetulan aku mudemu urum Michael Sinise si mungékuti kegieten mantan Presiden Amerika Serikat Bill Clinton selama wé i Acih. Ku Michael aku mungune tentang jadwal ulakni rombongen Palang Merah Rusia ku negaraé.
“Mukune Win kati mungunei jadwal ulak ni kami. Ara hadiah si malé iosahko kin aku atawe terih mupisah urum Alivtina ?”, pengunen ni Michale.
Meski lagu mugintes atas pengunen Michale oya, kujeweb singuk-ngukké.
“Reroanné !”, kenaku.
Michael kedik. Jema rawan tegep ini menepok-nepok kerlangku iwan rami ni jema munyamut géhni Bill Clinton.
”Young Blood” sindirré. Waktu oya, kuinget ilen lo Jemat. Kuponyéren gas ni honda, kusangkan ku Blang Bintang.[] Bersemet…
