Karya: Win Ruhdi Bathin (WRB)
Diterjemahkan Kedalam Bahasa Gayo
Oleh: Aman Renggali
SEBELEM ku Banda Acih bang Agus munyelesén Sekolah Menengah Atas (SMA) é i Gayo. Wé penah munebuk atawe mumuger uten hinge kédéngngé mupolok. Waktu batang ni kayu sitebangé urum galang malé murebah wé musangka muhinder, nta mukune-kune renye kédéngngé kona den mupolok.
Ketike bang Agus a musangka ara sara cabang ni kayu muterkuk ku sakaé sehinge gere lepas né mulangkahen kédéng, nta sanané ke bedekrok, kédéng kuenné mupolok. Kejadin oya terjadi i perempusen Kelupak Mata tekala oya. Kuinget ilen kédéng ni bang Agus ni ibantalen urum papan urum guru Garing, guru rurut ahli polok.
Alevtina si mumotret pepien momen foto menéngon ku arahku. Gere tetonin luh ni mata-ngku si munenting pepien tétés. Lagu mugintes wé, iteduhné renya aktivitas mumotretté.
“Mukune Win. Sana si nge terjadi”, pengunenné heran sesire mudekat ku aku. Macik négonné atéwé.
“Gere sesanah. Ninget aku kin abang si osop mai Tsunami oyawa. Persis i tempat kite sesukni bekas tapak ni umahé tengaha”, jewebku sire munelap bekas ni luh mata-ngku sigere terpitet.
Ijurah ni Alevtina pumué, isapunné luh ni mata-ngku si mujaril ku pipi. Pemuloé malé kutulak hingge pumu ni kami bersentuhen i tuyuh mata-ng kiriku.
“I am so sorry… nge mujontok peningetenmu kin peristiwe dahsyat oya”, kené sesire tetap mubersihni sara tenting luh mata si taring. Ikhlas aku kin beluhmu bang, aku membathin.
Mari oya kuceriten kronologis kejadin Tsunami, Alevtina pepengé urum sunguhé. Tsunami ni le si nge mutepur hancurni sara peredeben i Acih. Bandingenné henye ara wan kiteb suci. Selaén bang Agus, ara sarami aka-ngku i Meulaboh juge urum anak-anakké. Kak Ahyarfati gerallé, wé betugas sebagé biden. Si rawan urang Meulaboh a. Gerallé dis urum geralni ama ni Alevtina, Ruslan. Jesed si roa wa, juge gere penah demu sawah seni.
Mari oya katinti oloktu sengap den pebening, kami kemudien ménum wih keramil mude i tuyuhni kayu rubu tenaring ni Tsunami. Suasana mencair. Kunul kami demu arap wan roa kursi plastik.
“Win nguk ke ko kufótó?”, kené Alevtina sesire mualan ni kamera digitallé kuarahku.
“Te sana salahé”, kenaku sire munetah gaya si munos Alevtina kedik. Iringni i ponné teridah pótih i balik bibir tépéssé. Kemudien aku mungune ku Alevtina, kune ceriteé wé si lulusen jurusen Ekonomi sawah mujadi relawan ku Acih ni. Sementara wé nge bebuet i toko buku kul i kuteé.
Pedehel i wan suret elektronik Alevtina sebelummé, isebutné setelah setamat Fakultas Ekonomi i Kazan, Alevtina bebuet i sara toko buku i kuteé.
“Ceriteé naru Win. Nge kubetih den kubaca béwéné kisah ni kutemu, aku tertarik géh ku ini. Ara “magnet” si munos aku bekenak géh ku ini. I tamah mien kisah kute asalmu. Si gati ipeperiko negeri di atas awan, Nenggeri Antara, Gayo”, kené Alevtina mujamutni sedoten keramil mude den munyélukné.
Memang ara kuosah sara alamat situs online si kukelola kindiringku setelah Tsunami. www.gayolinge. Situs ini kemudien teduh kerna kesébukenku. Iyoné simen kutampilen keindahen lenskep den human interst ni masyarakat Gayo si betani den munórépi kóró kude. Sehinge gere heran ike teridah sara anan-anan tengah mubio kóró, atawe kekanak i Mendale si tengah mugenei kóró den kude.
Gere ilen teridahni emun waktu soboh laó si muawéi bumi Gayo sebelem ikini beluh matan ló soboh. Peralihen emun si berangkat den beluh beriring kerna cahya matan ni ló mubiesni degradasi warna si olok mampat.
Antara pótih, ijoé ni donya, urum kóning jingga den ilang mude ari matan ló. Lókisen alam simunos rasa den aténte mugerak akan sara kekueten i balik si teridah ni. Belangi mampat Sang Maha Belangi bagi penduduk Gayo si terpilih.
“I Bandara Sultan Iskandar Muda semingu si lalu, aku sempat pangling. Kerna foto si kirim ko, mubeda urum kenyataenné. Kao teridah lagu mukurus. Pedehel i fotomu teridah lagu mugotol pora. Aku pangling, betul-betul pangling”, ucepku. Tersenyum, wé munéngon kuaku.
Menurut Alevtina, foto oya ikirim nge mari tamat kuliah wan sara acara pesta. Pesta ulang tahun ni pongngé. Pesta oya berlangsung hingge tengah melem. Delé rakan-rakanné si kemudien mabuk den mulakuken perbueten si galaki pakéa. Termasuk sex sesaat. Ara si wan kursi tamu atawe sofa, i kamar mandi, dapur atawe i taman. Bebas seje.
Alevtina berkenak ulak ku umah waktu oya, ketapé i tehen sara jema pong rawanné si ibetéhé, ketapé gere damal den akrabtu. Jema rawan oya mabuk oya cube munolik ni Alevtina, mumakati berkencan. Tentu seje Alevtina munulak den berusaha muluah ni dirié.
“Beruntung aku gere mabuk berat waktu oya. Ike aku mabuk, tentu seje sanahpé si terjadi gerené terkoai. Lagu sana si ibuetni rakan-rakanku”.
“Sawah lagu noya ke?’, pengunenku penasaren.
“Iya. Oya hel si biasa ike isoné Win”, beles Alevtina.
Menamah pemanganen khas Acih selain keramil mude, ku pesan roa pingen mie Acih. Salah satué makanen favoritku. Ku tutungen mien rokok kretekku. Mi Aceh si kupesan rupenné delétu ledeé sehinge oloktu jing kin délah ni urang Rusia ini.
Lucu munéngon Alevtina nge kejingen mengipes-ngipes ni awahé urum pumu. “Hah…jingtu Win woy, gere lepas aku mangan jing”, kené. Sara gelas wih pótih gelis idegotné. Salakké ilang den malak. Ine sayangépé le !.
Ilanyut ni Alevtina kisahhé. Setelah mumutusen mujadi relawan den lolos seleksi, wé mujeleni konsentari i kém pelatihen mujadi relawan selama tulu bulen sebelem iterjunen ku Acih. Latihenné tentang berbagé cara den tehnik mujadi relawan Palang Merah standar Rusia si olok ketat den disiplin.
Selama munórómi pelatihen oya beret beden ni Alevtina ni turun drastis. Ku angukken ulungku tene mungerti kune kati terjadi perubahen ku dirié. Sebenaré, delé hal si kenaké kukunei. Ketapé rasaé lagu si tir tu den aku terih munos Alevtina terséngung. Minselné lagu pengunen apakah kemanusieen alasen utamaé hadir ku Acih ni. Atawe ara alasen lén si itoninné. Lagu musok pora aténgku.
Selama hampir setun berkomunikasi urum Alevtina, baro tulu bulen terakhir Alevtina memutusen mujadi relawan ku Acih ni, den hal oya adalah pengunen kul kudiringku. Hampir serlo kami i sekiter Ulhee Lheu, reroan kami. Alevtina senang den pues. Ongot-ongot gati ku kucengangi rupeé sesire beraktivitas. Lagu si ara rasa galak naté-ngku sebagé jema rawan den bebujang ku jema banan ini. Enta i bagin sesi?. Lagu ikotné matante. Aku besene urum perasaen. Nge jatuh cinta-ke die aku ge?. Eh, enti mulo.
Koetaradja mujadi Show of Force, berbagé tentera denia si mumakék berbagé warna ni seragam den alat militerré gune munosah bantuen si bibes wan masa tanggap darurat. Tanpa senjata, henye seragam. Amerika merapatni kapal induk-ké. Berbagé jenis helikopter den angkuten darat hinge Humvee.
Engkip jelen urum alat berat den rupe ni urang asing si munosah senyum kin penduduk Acih si selamat. Béwéné jelen protokol misi, ari Jelen Sudirman hinge Jelen T. Nyak Arif. Ari Lhoknga hinge Krueng Raya. Acih ni lagu i kepung urang asing.
Demikien hallé urum wartawan atawa jurnalis. Ari Amerika hinge Afrika. Mugunen bantuen urang asing, bererami pakéa munaran program den pelatihen kin jurnalis Acih si taring. Pelatihen jurnalistik wan muléput konflik den damé, teorié. Ringit lagu dum sicecor ku Acih den uwetni berbagé pihak kati demu bagin ari kucuren dana urang asing oya.
Acih mujadi besi berani ari géh ni jema urang asing mumerah ringit. Acih lagu jema banan belangi si petajir den muke. Sebelummé gere lepas i sentuh, kecuali ipengé den i gambaré pelin wan ruang kaca.
Seni gere néh. Béwéné sawah, welcome. Tanpa munéngon ari suku si, ras den agama sana. Béwéné mujadi sehebet i balik iming-iming bantuen den program. Gerené mubetih lintes batas.
Kesébukenku sebagé jurnalis munos aku jarang demu urum Alevtina. Demikien juge Alevtina si disiplin wan jem-jem bebuetté. Itamah mien interaksi urum warga urang asing si mujadi jurnalis i Acih, munosah berbagé pelatihen lagu gere muwaktu né, apalagi ketike mudedik deadline.
Bahkan mupepienen aku munepongni para jurnalis si géh ari berbagé belahen denie i berbagé kute i Acih ni. Menggunen armada deret atawe coper bin helikopter. Waktupé berlalu i isi kegiaten rutin mujadi pewarta.
Wukku ike naru lagu mie instan modellé mukerépot, kudaten naru gere berurus. Nik helikopter nge mujadi hel si biese saat mujule berbagé bantuen den kebutuhen ni pengungsi si gere ter jule ike mulewati jelen atawa angkuten deret. Munumpang helikopter urang asing si sar-sur kuso-kini. Kemudien munos berita den pepien foto kin kantur berite asing.
I wan mudedik deadline den persaingen antar media gune meraih pembaca urum oplah sedelé-deléwé. Apalagi tempatku bebuet koran ayu ben ilen araé, sara sms ari Alevtina mayo den muninget ni aku bahwa Alevtina sehebet penaku ari denia maya ara i Acihni, dekatswe.
Sms Alevtina mumakati aku munepongniwé kenge mari jem bebuetté kerna suntuk wan rutinitas buetté. Disné we urum aku. Semangat terpacu kati mudemu mien urumwé si belangi. Terbayang kedék den senyummé. Ara si menarik den rahasie ari jema banan ini. Aku penasaren. Nge kusangupi kenakké, akupé mupersiepen diri.
Tapé sana si turah kupersiepen?. Mudemu pejebet penting atawe petinggi militer seje aku mumakék sepatu selop si biasa ipakék pecinta alam. Ah sabodo teing. Masalah kemudien témul ketike malé bergerak beluh.
Kusi de nge kenderaenku?. Gere ara néh i tempat parkir. Alah aduh ine, ninget kenderaenku tengah i pinyem pong si tengah muléput berita. A nge, kunehmi ya !. []. Bersemet…
– Alivtina [3] – Alivtina [2] – Alivtina [1]
