Karya: Win Ruhdi Bathin (WRB)
Diterjemahkan Kedalam Bahasa Gayo
Oleh: Aman Renggali
SEKEJEP seketike aku bepikir. Kemudien sara cara atawe ide témul kindirié, nta sana kati gere kupinyem becak ni bang Nurdin padih. Ton bebuet bang Nurdin ni dekat urum kanturku i Jelen Panglima Nyak Makam.
Umah ni bang Nurdin nipé persis i samping kantur tonku bebuet. Roa anakké osop ketike Tsunami. Seni wé taring roannémi we urum si banan. Bang Nurdin demu bantuen ari pemerintah berupe becak sebagé alat usahaé.
Sebelummé, becak bang Nurdin ni nge tue, keta seni wé nge ara becak ayu. Kebetulen méh selesé semiyang ashar bang Nurdin nge sawah ku umah. Jema rawan siberkulit gelep ini kudemun tegah kunul i lepó ni umahhé beruke baju. Teridah pepien “pulau” berwarna pótih munempel i dede den rongokké. Panu. Mumingangen upuh kerung. Setengah awanné i emus-emus kuyu. Dedeé mujangut rubu. Demikien jampang den jangut ni dagué, gere berurus. Tene khas ni jema rawan pesisir Acih.
“Assalamu’alaikum”, kuucepen sire munatangen pumu kuenku ku atas. “Wa’alaikumussalam warahmatullahi wabarakaaatuh”, isamut bang Nurdin urum faséhhé lengkap urum tajwid den mahraj wan logat Acih, wépé munatangen pumu kuenné ku atas munyamut aku.
“Jeip kupi Win”, kené muneber sara gelas kupi.
“Hana sempat lé bang”, kenaku sesire renye rap mudekat den kunul i semelah kirié.
Kuhallen renye rencana den nietku malé muminyem becakké, kati nguk nemah Alevtina dediang keliling-keliling.
“Alahai Win, meurumpok ngen awak inong Rusia e”, kené bang Nurdin senyum sesire kedik. Néngonné bang Nurdin ni paham sana kati aku lagu mukekarat pora, maklum wépé ke penah bujang. Atta…
Kuponyéren gas becakni bang Nurdin, kak Nong si tengah munakut seliming si ijemuré ari sobohnemi i atas ulung keramil berayu kin tetakké henye tersenyum. Kak Nong persis lagu urang India. Ike i Jekerta le kak Nong ni, kadang merapé mujadi artis urum rupeé si mampat.
Munamat setang becak ni rupenné gere semurah nemah kenderaeen roa roda wey. Kemudié lebih teger den ike pora mukeras sangkaé stangngé renye mera lagu mujuah pora. Agak sulit mungendalinné hinge kudemun cara mujinakné sesire berjelen.
Sawah kuarapni pintu gerbang stadion Lampineung, kupecikken klakson-né. Ari jarak nge kéngon teridah Alivtina sesuk pejenyong munantin aku. Sengeje gere kuuke helm sikupakék, helm ni ulu-ngku si berkaca gelep.
Alevtina pecengang kuarahku. Tapé wé gere mugerak, gere bereaksi maksutté. Kuklaksonnen mien, oya baro mubalik rupe urum bedenné. Ketapé wé gere der ilen sahen si nemah becak a, gere betéhhé aku sinamat stang si mungemudinné. Akhiré kuuken helmku.
“Waiting some body, madame“, berakahku.
“Hei Win, oo kapik”, kené lagu malé metuk kerna heran den gintessé.
Iyo oya, Alevtina teridah olok mampat. Memakék rok naru, baju kemeja naru pumu warna gelep urum wuk siberikot ku kuduk. Sementara kédéngé iselukké sepatu kets, den sigere kalah kona ni aténte jema banan urang Rusia ni munyeluk tödöng tipis, setengah wukké idatenné tangkuh ari tödöng a. Mirip lagu jema banan urang Arab. Sopan olok, sederhana den berseheje.
“You look so beautiful..”, kenaku kowé sire ecék-ecék munutup ni awahku si peperngah kerna tahe munéngon mampat den belangié. Alevtina-pé senyum lagu kenyanyan den becerak,
“Thank you very much Win. Thank you...”, kené. Kubetih wé musilu kerna unang kemél kédahné.
Pótih ni kólétté mupenilangen.
Menurut Alivtina wé sengeje mumakék baju oya kerna teringet foto si ikirimmé kin aku lewat email sebelemmé. Hanye seje, kené, i foto oya gere betödöng. Ah woy ine-ine, lagu makin lekat matante ióbóh jema banan urang Rusia ni. Bathinku.
Kujelasen ku Alevtina sana kati munggunen becak ni bang Nurdin, kerna hondaku tengah ipinyem pong. Wé pehem, kemudien nik kuatas ni becak. Kuguel lagu ni Rhoma Irama iwan becak bang Nurdinna si full musik. Judullé “berkelana”. Kuluahen helm den munikmati lagu bang haji. Alevtina henye kedik munéngon tingkahku. Becak kuarahen ku jalan protokol Panglime T. Nyak Arief.
Porakni ni kute Banda Acih seulah osop urum emusni kuyu ari becak si kami kenderai urum sangka si gere oloktu keras. Tódóng ni Alevtina muperlut kurongokké kerna i tipakni kuyu. Kuaarahen becak kuarah Belang Padang.
Ménum munikmati es buah i seputaran Belang Padang.
“Tengaha, saat i Madrasah Aliyah aku gati kuini den munikmati es buah”, kenaku. Kami ménum munikmati es buah i atas ni becak. Kupeterét Alivtina pepien foto headshoot. Enta lagu semakin muakrab aku urum Alevtina.
Azan megrib tenengé ari Mesjid Raya Baiturrahman. Kuperin ku Alevtina semiyang megrib mulo kejeb, sebelem mujulen wé ulak. Gere delé cerak, i onné. Senaru ni dené jelen ulak, i seder Alevtina bahwa Islam nume hel si ben bagi wé.
Kerna i Kazan, meski Kristen ortodok lebih dominan ari penduduk ras Rusia si taring bermukim i yoné, ketapé Islam juge mukemang urum jerohhé. Islam ianut oleh suku minoritas ari negara pecahen Rusia si lebih dominan Islam.
“Ama-ngku bergeral Ruslan, wé asli Kazakstan. Ketapé amangkua lagu nge lupen urum agamaé. Ine ari Rusia. Beragama Kristen Ortodok ”, jelas Alevtina. Aku menanguk kerna Alevtina sebelumé nge penah munyerten tentang keluargaé lewat email.
Selain tentang kehidupen keluarga i Rusia, Alevtina juge bercerite delé tentang jema rawan Rusia si menuruté kurang igalaki é.
“Simen jema rawan Rusia si ulak ku umah wan keadaen mabuk. Kerna delétu ménum den gere peduli sanahpé”, penyederné.
Hel oya olok mubeda urum si éngonné i Acih. Berkeluarga sara hel si sakral den wajib. Sehinge isihpé teridah keluarga begitu akrab urum anak-anak i sekelilingé.
Doine, boh kune senangé morip lagunoya. Kerna morip ara mutujuen den cara tersendiri wan aturen, kené jema banan Rusia ni. Béwéné, sana si ibueten olok muarti kerna ara keluarga si dor penanti i umah. Sementara morip i negerié, tamah Alevtina, demikien sulit ika gere ara mubuet urum kebutuhen morip si mal.
Berkeluarga mujadi hal si sulit meski delé jema morip murum den ara muketurunen tanpa muikoten pernikahen. Henye idasari mera urum mera. Status ni anak mujadi gere jelas den mera mupisah barik selo ike gere arané kecocoken. Kekanakpé gati mujadi terlantar den mujadi korban kekerasen seksual. Biksembeta, delé juge keluarga si morip normal den berkeluarga lagu sideléné jema siara i Asia.
Sebelem sawah ku Stadion Lampineung, teringet aku tempat si keren munikmati kupi Gayo urum cara moderen. Hip Coffee, sehebetku si empué, Novaldin gerallé. Alamatté i Jelen Panglime T. Nyak Makam ilen. Ku teber ku Alevtina singah koné. Ianguk né ulué sesire senyum, akh. Emmm!
Kebetulen, sang Barista ara iyoné. Kami kunul ikursi bar agak mupenatas pora. Alevtina kukenalen ku Novaldin si sebelummé hanya munyedien burger dan pemanganen lénné non kopi. Mari munoromi kursus i Senayan Trade Center Jakarta (TCJ), pengusaha Gayo ini munamahni menu ménum kupi mugunen mesin conti.
“Yah, sahenni pak Win. Bise di ge!”, kené Novaldin unang munolol sentan mari bermatjari urum Alevtina.
“Inepun mu ari Ponok Baru”, jewebku tingir sesire kedik mugagak.
Ku torohen daftar menu ku Alevtina. Sara gelas cappucino kutawaren kin wé. Sementara aku mumesan espresso. Strong Coffee. Novaldin lagu munulak munossé. Urum bahasa Inggris semampué, Novaldin bercerak ku Alevtina.
“He is a barista too. He can make you a glass of cappucino”, kené Novaldin.
“Is that right Win. You never tell me?”, beles Alevtina. Mata ni bule banan ni pecengan ku aku, seulah muniro kepastien atas ucepen ni Novaldin.
Teke terpaksa aku turah mayo kowas. Mesin conti roa grup ini gere asing néh bagiku. Kerna aku penah kursus i tempat dis urum Novaldin. Apalagi saat praktek, aku mugunen conti. Conti berbaju stainless urum paduen sagié warna ilang murara.
Bierpé lagu mucakah, ku muloi beraksi. Pemulo, ku tos cappucino. Sara shot espresso ku tos sebagé bahan dasar cappucino. Sara shot berisi 30 mililiter kupi terbaik Sumatera. Arabika Gayo.
Nge munge oya, kustem susu segar gune muhasilni foam atau koboh ni susu wan gayung stainless. Mari oya foam-mé tangkuh urum suhu ideal, stem kuteduhen sesire kuayun-ayunen kati susu lebih pedet den mikro foam-mé murah ibentuk.
Arih-arih, susu ini kucampur kowan espresso 30 ml. Pora kuayunnen, mujadile sara bentuk bergambar até. Love. Kuédangen kin Alevtina. Mataé pecengan kolak.
“Wow’, kené sire munuken tassé den mumotoé.
Écék-écék gere kuérah, ulak aku mien ku mesin espresso Novaldin empué, menggrinder kupi den munos espresso. Nge mari munge ku mai den kunul i sampingni Alevtina.
“How do you thing?”.
“Very nice with love picture. Are you a barista?’
“It long story”, ucepku senyum kuarahé.
Kerna Novaldin nge munuke kisah mujadi barista, akupé munuke diri ku Alevtina, ku kisahen tentang sara cita-cita si ngelemen kunipin, si gere ilen terwujud. Munos cafe khusus kupi i Gayo.
Sebelummé aku nge penah urum kursus i Jakarta. Kebetapé kenakku ini tertunda kerna aku mumilih mujadi jurnalis gune muberiten kondisi Acih mari Tsunami. Sertifikat barista kukemasen ilen wan bingkai kaca.
Tawaren mujadi jurnalis kuterime muninget urgen-né berite tentang Acih wan masa rehab den rekon (Rehabilitasi-Rekonstruksi). Pedehel aku nge mumotosen surut ari tulis menulis ini. Muléput konflik Acih olok nyanya. Berite den foto si mugambaren sedihhé konflik bersenjata. Antara oyongni bedil den umah si muséut, gere ilen mét si berjerangkangen.
Biak sudere rakan-sebet pembaca sekelien, kuénomen mulo kupi ni boh, kasé kite samung mien boh…!.[] Bersemet…
– Alivtina [4]
– Alivtina [3]
– Alivtina [2]
– Alivtina [1]
