Salman Yoga S
Sebeb ini nume pertama nge mupien kali
Tengaha tun 98-99 penah munimpe diri
Demo i Jogja den munos kaset baca puisi
Tentang kemanusieen Aceh konflik GAM-RI
I intip-intip intel den idededik pelisi
Sawah mandah kejeb ku Madura-Bali
Iceriten Purnama, Okem, Rajali den Win Yusra
Kami gere sesanah den bahkan sabé berberakah
Kedik-kedik urum pelisi sire minum kupi Gayo
Urum pelisini kami akhéré béwéné renye ramah
Termasuk Kapolresé pé maié mangan kumah
Gere pipet gere guser kerna keber nge tersier
Hinge Tgk. Mursyid DPD mujadin diri kin jaminen
Rakan sebet keluarga pukekune i Takéngen
Kune de nge paké si onom kadang nge teronop
Si kite teréhi lagu demo reformasi déba osop
Nge langak lungkep musangka iderei mopop
Alhamdulillah béwéné sehat walafiat
Tuntuten si demo mukeber nge ipercepat
Bantuen ari negara den presiden nge mepat
Ara si kin sembako den ara kin umah si mularat
Tujuen niet ikhlas bentuk kepedulien kin rakyat
Akupé renye ialoi urum Mursalin den Konadi
Imai ku umah mah dediang keliling Slipi Cikini
I jamin gere mukunah den buge gere sesanah
Kerna si iperjuangen sibenaré adalah amanah
Kin kemaslahaten rakyat jema si korban gempa
Si olok di nyaya den susah déba gere berumah
Mangan berdapur umum taring wan terpal tenda
Terlebih mien bencana pas pedi wan ulen pasa
Sahur tekörik semiyang terawéh gere mumersah
Denang alas i atan blang déba koran kin semala
Muhedep Tuhen sinosah ujien Allah Maha Kuasa
Alhamdulillah béwéné sehat den selamat
Ari segele bantuen heme ni Tuhen buge berkat
Asal nge beta turah sesabi diri sebagé umet
Alang tulung wan bencana berbantu beret
Musibah gere kite tiro
Bele gere tebetih
Si temas kaya mubantu si legih
Buge pulih semangat sitertimpe
Cerite ini gere kutetamah gere ku aran-aranen
Betul terjadi wan perjelenen kesenien ku Jakarta
Delé saksi mata den jema si urum wan acara oya
Tun oya tun genancing muserpa urum bencana.[]
Takéngen – Jakarta – Bandara Soekarno Hatta – Tangerang – Sulawesi – Jakarta – Banda Aceh -Takéngen, 2013 -2021.
*Dipetik dari Buku Kumpulan Puisi Bahasa Gayo “LIKES”. Takengon The Gayo Institute (TGI), 2022.
