[Puisi Bahasa Gayo] Pungi
Salman Yoga S
Sara
Kilet mukelieten mutayang i langit
I seselang gelumang gulung ni emun
Tamun mutetamun kuyu berdeso
Emussé lagu langit musangka
Berjangka langkahé mamang
Mutayang i luesni élopen
Unang musangka idedik jema
Kutangaken ulu silu gedép ni mata
Cahaya mukelibeten relem tejem
Sesilon gere teréngon
Tajuk ko bunge ni kerléng
Mulingang iwan lut pepantaren
Denem sigere terungeren
Serinen beluhmi munginté
Galakké mukeber tunung
Pungi kilet mulintes
Lagu mugerbes jentik ni até
Langit beraté uwes
Nguk sampé teles kelibet ni rupe-Mu
Roa
Pungi
Kuéngon mukekilet lagu munampar junté ni emun mugulung
Gere beteduh mudelapi pucuk ni baur
Mungelséhi langit item
Kedut
Dekat pedéh i bubung ni umah
Batang-batang ni uyem muretak berecak
Ilang murara
Uwah-uwah ni nangka lagu kona tengkah
Mugeril
Bergil
Tulu
Pungi
Gaéhhé sabé wan malé musim berume
Ketike tempéhni patal nge jeral beterlis
Tipis nyanya muniti
Cak ni tanoh remo bebuntangen
Wak-waken musompong
Semé lemi ijon-ijonen demsi perus
Lémus lagu si ilagus urum uluh beranut
Patut tudung si ilang mejen mulawi
Enta rupen jamu si mumerjak biak berawis upuh kerung
Jengo gutel del urum kupi becérék
Ari wih musiu mudédék i garu
Kunul bejunté i lenkung ni patal
Lédak gatal gerené beriro
Kerna si bejamu mujergut lagu sebet jemen berpawak cacak
Opat
Pungi
Ara sara berite sigenancing
Gere penah tenenting kukemiring
Tibe-tibe sawah keber si munos gintes
Nik rasani rayoh ku ulu
Sesur jerungunni wauk
Gabuk
Até karu
Yah
Enta mukene nge die
Kune o
Selohen
Nge lagu pungi munyemer
Keber tersier rege ni kupi demsi rerut ku tuyuh
Rege ni gule-gulé lebih mal ari oros
Minyak nik mupancur ku atas
Pelitik nge gerené cerdik
Rakyat macik munéngon pejebet besiwik
Korupsi lagu berulon-ulon sa dedelén
Ulamapé sideléné nge berongot
Gere mugémot munéngon maksiet
Umet bejat gere berkenkun tamun
Cerun ni tanoh munyebu kampung
Ulu ni wih uten nge lapang
Bango kabang ari pelu paya
Kerna tanoh lédak nge isebu
Kin sunut bangunen
Lime
Pungi
Kuyu bedeso
Uren rintik siré
Enti tilok pumu ku kelamun
Ike salah turuh
Ayon jejari kowan kerédék
Onom
Tir temuni
Enti méwén i tuyuh ni kayu
Enti belongoh ku perdu rubu
Gelah senanap musilu kowan umah
Jarak ari bele
Gip ari setar ni pungi
Pitu
Pungi
Buet enti sesanah
Kasé sawah napah
Tuah mera kin tulah
Buet enti sesanah
Wan awah gelah si lemak lungi
Budi berpari
Dak maté i ingeti
Rasa kin basa
Rupe kin penalun
Buet enti sesanah
Pepar pungi béwéné mukunah
Waluh
Pungi
Gegur
Gunter
Gerle jinger koro kude
Mulentayon ari arul ku arul
Mugelumang ari karang ku pematang
Denie lagu nge merul
Térul besene wan senye
Mera kin bele
Siwah
Pungi
Lagu kawat listrik berterbangen
Megerépél bertiaken
Mera murara sesara sagi
Bubung ni umah lagu demsi dere
Pucuk-pucuk ni kayu lagu si itutung rum sesongkoten
Sepuluh
Pungi
Sekejeb
Mulibet
Kilet
Lidi ni rara
I langit
Putih ilang
Mupalit
Rigit emun mutamun
Turun mujadi nami
Lemi senuen
Limen mujadi pupuk
Beje belenye ni tembuni
Sebelas
Pungi
Pungi ni wan Alquran nge isebut
Sebagé tene den kuasa ni Tuhen
Ara tulu penyebutenné
Ar-Ra’du, ash-showa’iq den al-barq
artié kilet berupe cahaya si munyamar lagu garis ni rara
ari langit murentang ku bumi petajir
mubentang i langit iseselang ni emun beiring
mukelibet nyata lagu garis
wan sekejeb seketike renye meling gegur
detummé sahenpé mera gerle
araé sigantinné wan lao malé uren
tapé mejen mera wan porak laopé
Due belas
Pungi
Ike tepengé ku kite
Gelah tir muninget, bersehedet
Berdoa si inget-inget
Subhanalladzi sabbahat lahu
Maha Suci Allah si pungi bertasbih Kowé
Subhanalladzi yusabbihur ra’du bi hamdihi
Wal mala-ikatu min khiifatih
Maha Suci Allah si pungi den malaikat bertasbih memuji-É
kerna dem terihte
Firman ni Tuhen Alquran suret ar-Ra’d
Den gegur bertasbih memuji- É (demikien pule) para malaikat kerna terih Kin Wé
Wan hadis pé ara isebut Rasulullah Saw
Pungi ni laing ni para malaikat
Si bertugas menurus emun den urum wé murébék rara
Si muminahni emun lagu si kenakki Allah SWT
Takéngen, 2019-2020
*Dipetik dari buku “Serangkum Puisi Bahasa Gayo, Pungi den Pakan Laya”. Takengon The Gayo Institute (TGI, 2020. Hal. 121-128.
