Rica Mahbengi
Kuyu beremus lemut ari arah selatan, batang-batangni kayu begerak ari kuen ku kiri, tepengé cico ni manuk sitemas i pengé ku kemiring ku, uwet ni aku wan kelem ini urum baju nomé si belangi kurasa.
Kusilaken layar ni tingkep pas i arap ni ton nomé ku, teridah mata lo kemél-kemél nuruhen cahaya é si soboh ini. Ku inget mien waktu wé géh ku wan mȯripku.
Kubetih sahen si senang saat oya, aku atau ko, waktu oya langit senye tengah ilang-ilang, lagu ara keber si jeroh malé géh. Kucing kucak oyawa tibe-tibe géh i arap ni umah urum mataé si using urum jangut é agak gasut. Ko, memang penyayang Hewan, renye i mai é mayo.
“Jeroh olok kucing ni”
Ceraké sesire nirin kucing, urum mu ré jangut ni kucing urum lemah lemut. Aku pé njém, meski was ni até ku ara tikik rasa gunah, kune kasé ike wé mungaru i kite?” Tapi ko jep dor ara caramu nos sesuatu kati teridah lebih jeroh, bahkan was ni bentuk kucing juah sekalipun.
Kucing oya kubuh gerel é Gio, si mujadi bagien wan ni mȯripku jep loni. Jeb sesoboh pas aku kunul i meja mangan, Gio pé géh ku tenumpit ku, sesire mulédos menye ku aku.
Aku pé jeb dor kedik néngon wé mu sangka, mudedik bayang diri é i rering. Bahkan, ko si pebening, gati mu jém néngon tingkah ni Gio. Gere penah ku betih selohen tepat é wé lebih memilih nomé i tenumpit mu dari pada i taon nomé é.
Tapi oya gere masalah, kerna ku betih berbagi hal si dis kin Gio. Was ni sepeden te, nge mule i terasa bagi ku, aku i awal é gere galak kin kucing nge muloi galak kinn kucing, amaku merasa ara sesuatu si lebih murip den beda kerna ara é Gio.
Kebahagieen oya gere ten mokot, wan sara soboh, Bengi mumeden aku beluh ku Atu Lépés, gaib tu ari umah kire sekiter 25 menit we. Bengi ni pong ku ari kucak we pong si paling mubetih perangi ku. Gere penah taring ni Gio bier kusi belum kerna wé merabeh mu nunung aku.
Sawah ku Atu Lépés kami pé teduh siri munéngon pemanangen si jeroh urum wih si terasa sejuk kerna langsung ari atas bur, i Atu Lépés ni ara jajanen si paling sedep si sesuai urum délah te kerna aku hobi jajan.
Nge mari kami teduh kami pé gere munyie-nyie waktu kerna gere né seber malé murasanen wih sisejuk, kerna lo pé nge dabuh senye kami pé siep-siep malé ulak tibe-tibe aku merasa ara si janggal lagu ara si kurang ku engon ku keliling ku, aku gere munengon Gio.
Nye ku éngon Gio gere ara, urum rasa melas, até becampur sedih.
Bengi pé renye becerak ku aku kati enti gunah.
“Ah paling Gio pujejamah dekat-dekat ini we, tah kite perahi mulo”, kené Bengi.
Nge kami perahi Gio i Atu Lépés ne sire kami kune ku jema si ara iyoné. Namun, gere ara jema si munéngon né jantungku tibe-tibe bedegup keras aku berharap ini nipi, tapi rupenné ini nyata, lo pé nge mulei gelep.
Bengi pé makati aku ulak sire berunger aku ku empu ni Atu Lépés ike kahé munéngon Gio tir telepon aku, sesire munyeder bentuk rum model ni Gio. Aku rum Bengi pé renye ulak urum até si luke. Ike nge mosop ni lagu si ara si kurang i was ni mȯrip te.
Ku cube mien géh ku Atu Lépés ne mumérah Gio si osop ari mataku. Namun sejak oya, Gio lagu gere néh penah teridah mosop gere mu bekas naringen luke wan naté ku si gere terperinen.
Lao pé nge berlalu, aku pé berusaha munerime kenyataen. Aku pé sadar ternyata aku gere betul-betul mulupenen Gio. Gere pas telupen aku, jeb ku pengé ling ni kucing i deret, aku pé teduh kejeb menéngon urum penéngon si sulit i jelasen urum kata-kata. Kerna gere ara si pas ilen mugantin Gio, gere ara ilen pengganti é bier wé nge beluh.
Iwan sara iyo si kedut, waktu aku tengah kunul i arap numah, géh sara kekanak kucak munemah kucing kucak kurus. “Kak ini kucing juah, sahen mpué win”? kenaku.
” Sine ku depet i kendiring ni jelen.”
Mien cerakné sesire munosan kucing é ku aku, ku éngoni kucing wa. Ata e si blau lagu cahaya ni ulen. Dis lagu pemulo aku mudemu urum Gio, ara resie tersiret si munemah perasaan seolah-olah kucing ini sebage pengganti si munemah ate senang. Meski ara sesuatu si ganyil géh ku dede.
Ku bubun gerel ni kucing ni Vio, meski gere yakin tu ini pilihen si tepat. Wé mu béda urum Gio. Vio lebih ongot, kegatiné temenep I sagi ni umah atau i tuyuh ni meja, gere lagu Gio si dor dagi bijak gere terperi. Mungkin kerna gilen ramah i umah ku atau mungkin beda sipet é. Namun, mokot kemokotné aku pé nge muloi pehem tentang Vio.
Vio ni gere dis lagu Gio, tetapi lagu siara perasaen muhubungni roanné. Seseger aku kunul i meja mangan, Vio pé renye géh kunul i kiriku, bier pé gere lagu Gio tengahna. Kadang, aku mejen lagu si becerak urum Gio si model pebeningé si munemah até ku tikik lebih tenang.
Aku pé kegatine besilo nge gati becerak urum Vio ni munuliken wé, den ku osah perhatien lebih meskipun bayangen Gio jep dor teles i mata seolah olah gere terasa tempat ni Gio nge muloi i mai Vio ni was mȯripku, tapi lagu si ara wé si gere lengkap si mugantin Gio ni. Walau pé Vio berusaha munyenang ni ate ku. Nge mu bilangen ulen aku urum Vio makin ramah.
Vio pé nge munuruhen sifet-sife jerohé ku aku si munemah sayang atéku kin wé. Was ni sara masa ara si mu ganjal wan niaté ku, enta lagu mu kune rupe ni Gio sabé terbayang i mata setiep ku kusuk beden ni Vio. Lagu ara perasaen si osop si gere tergantin.
Aku pé nge unang cemburu, cemburu kucing si besilo munisi atéku, cemburu kin perhatien si makin terarah ku wé tapi gere pas kusederen ku wé. Aku pé ongot ku cube munerime kenyataen bahwa Gio gere mungkin né ulak.
Vio ganti é kin kucing ayu te. Namun, ara hal si terjadi kelam oya. Saat aku tengah kunul i ruang tamu, tibe-tibe Vio muluncet ku penumpitku berbaring urum tenang.
Aku mumerus pora, kurasanen kehangaten tubuh é. Tibe-tibe aku muninget kin Gio.
Aku teringet saat Gio nomé i penumpiten ku, rasa é dis pedéh gere ara beda é. Vio memang nume Gio, Tapi kehadiren né, muninget aku kin kenangen manis si pernah ara.
Kao si munéngon aku ongot, mudekati aku nye ko kunul i samping ku. Ko merasa kehilangen Gio ke? Pengunen mu ku aku, urum ling lemut urum penuh perhatien. Aku hanya muangguk arah.
Tanpa kata si naru. Lo pé berganti, aku nge pas munerime kenyataen. Vio mungkin nume Gio, tapi wé adalah bagien ayu ari kehidupen ku. Aku muloi munéngon urum cara si berbeda, tanpa ara rasa cemburu atau pé terancam kerna kehadiren Vio. Tulun kami Aku, KO den Vio. Mubentuk sebuah kebersamaen si ayu, urum cara si berbeda ari sebelum é.
I kelem si tenang, aku kunul i sampingmu sesire mungelus Vio si alus. Aku mejém, merasa damé i wani até. Mungkin benar, gere ara si pas mugantinen Gio. Namun, oya gere berarti kite gere nguk munuken até kin sesuatu si ayu. Vio nume Gio, tapi wé adalah kucing si besilo ni mujadi bagien ari mȯrip ku. Den mungkin urum waktu, aku akan belejer untuk mencintai Vio urum cara ku seseréng.
Urum lagu noya, aku pé sadar sara hal: meski pé Gio mosop, cinta urum kenangen si Gio taringen tetap ara i was ni até ku. Den meski pé Vio ben géh, wé pé munemah kebahagiaen si beda. Kerna pada akhéré, si terpenting nume sahen si ara i samping te, tetapi bagaimana kite muhergei setiep momen si ara. Aku, Ko urum Wé, sebuah perjelenen si gere pernah berakhir.*[SY]*
Gajah Putih, November 2024
* Rica Mahbengi, lahir i Mongal, 11 Desember 1998, anak pemulo dari bapak Subahandi den ibu Irma Irawati, ara roa denganné. Mugalaki hel-hel unik, hobié benyanyi walaupé Buta Nada. Item mujadi warna favorité. Uwah ni Matoa adalah uwah si galak ni atéwé.
