[Puisi Bahasa Gayo] Ulung Lipah Bapak
: In Moemriam H. Sulaiman Aman Hafisah Meriah
Salman Yoga S
Ulung lipah bapak adalah rokok belinting
Si munyintung asap i dapur
Tempat ine mujerang kero jantar gulé
Ulung lipah bapak, bako kuning gading
I éles i atas ni jangka kekuden
Ulung si munluesni langka
Rues batang mugetah si munarun ruesku
Si munlémusni pinsil – meja belejer
Ulung lipah bapak
Ara sara roa tulu ikot
Ijeje i tuyuh ni kité pasar niken takengen
Jema mulintes, gerbes ni rejeki
Seratus
Seratus lime puluh
Due ratus
Due ratus lime puluh repie regeé sara ikot
: ara ilen simuneber lime puluh repie sara karung
Ulung lipah bapak
Ulung ni pintu jendela
Ulung si ijo wan dede ni ine
Si gere penah minéro emas berpuro
Yogyakarta-Takéngen, 1997
*Dipetik dari Kumpulan Puisi Bahasa Gauo “Pungi Den Pakanlaya”, The Gayo Institute (TGI), 2020.
