Awah*
Awah silencém
munemah keber
Renye tersier pahamdi jema
Ari ujung kuralik sibuk munyeder
Lagu narasumber jurubicara
Entapni awah mera beden suker
Gere terpeger upet urum cela
Jema sitemas wé terasa suker
Awah sicécor dabuh mungerana
Tejem ni bibir nge lagu sembilu
Rasa cemburu wan jantung rasa
Atepé melas renye bersebuku
Renye kudagu laoh ari mata
Berbisik-bisik dabuh bersisu
Keber mutentu enti penge jema
Ike makin murum rara urum kuyu
Lagu minyak lampu i pangan rara
Awah sicarong gere pilih bulu
Gere mutentu penéngon ni mata
Kemiring mumengé lagu nge layu
Cerak mujalu lagu munyelota
Oya kati donya mutamah karu
Situkang jalu muraja léla
Ike berlaku rusak rumah tangga
Sipet ni awah sebenaré genancing
Ike gere isaring luah nikekata
Tair di ilang sitipis kemiring
Renye kartu kuning talak ketiga
Sipaling jago awah munyaing
Perintah ni joréng renye kumata
Ike gere pané ate kin ecing
Gerelak ni kéding mulengat donya
Awah sipané munaos cogah
Sigere teridah perené nyata
Sipaling pané munaos pecah belah
Renye musalah abang urum aka
Ike itunung bijak ni awah
Tairdi sawah i undang bencana
