Salman Yoga S
Ari soné langkah gerené singah-singah
Pakat jeroh mapah tuah kerna ara janyi
Mudemui pak Saifoeddin Kadir pelaku sejarah
Singe penanti i umah Novarizqa anak mutuah
Mudemui pak Saifoeddin ni asal nge agenda
Ari Takengénmi king berencana turah mudema
Cerak sunguh kunul bertémpuh demu uku
Ara penelitien penting si perlu i sunguti
Mungunei sejarah kuneke pasuken Bagura
Ara pepien jem kami isoné kelem-kelem
Pengunen murelem ku perang Medan Area
Sahen pelin si beluh den sana pelin si ibueten
Tarsihen mulo berlangkah den sana si emah
Selo den isihen pelin perang mulewen Belene
Sebeb pak Saifoeddin Kadir ni urum serinenné
Si italu jema Awan Jaksa Agus Salim geral aslié
Sara pasuken Tgk. H. Ilyas Leube kin pimpinen
Tentu delé si ingeté den simen pemehemen
Kuneke kisahhé kati mera beluh murum perang
Padahal diri waktu oya usie mude tengah bujang
Gere tangung-tangung sara ine mien roa tepang
Sana kin doa sempena ni ine ama kati ijin terang
Sanahen pelin si iperintah ni Tgk.H. Ilyas Leube
Kati mera sunguh di sibeluh mupetaruhen nyawaé
Termasuk pepien anggota pasuken jema si mulebih
Delé si pang lagu Abu Bakat Aman Dimot contoé
Pang Ali den pang-silenné Onot Pejebe diantaraé
Sawah jem 4 soboh kami bercerite ramah
Mungune tentang sejarah heroik pejuang Gayo
Mulewen agresi pertama den kedue Belene
Antara tun 1947 hinge tun 1949 i tanoh Karo
Mudemu langsung urum saksi möripé bercerite
Ini sejarah penting wan Negara Indonesia
Peran para pemuda Gayo ari Negeri Antara
Perlu itulis jelas den terang iwan ni buku
Kin conto kune ke ama-amante si terdahulu
Kati ara suluh kin generasi si mude-mude
Bahwa merdeka ni negarante nume le itiro
Nume hadiah apalagi diplomasi perang sie-sie
Ketapé iperjuengen sunguh urum segele resiko. [Bersemet]
Takéngen – Jakarta – Bandara Soekarno Hatta – Tangerang – Sulawesi – Jakarta – Banda Aceh -Takéngen, 2013 -2021.
*Dipetik dari Buku Kumpulan Puisi Bahasa Gayo “LIKES”. Takengon The Gayo Institute (TGI), 2022.
