[Puisi Bahasa Gayo] Kerléng Tue
Musaradi
Lelang ni kerléng tue waé i geldok pé tama
Mórip jerngang i duru musara
Ampung-ampung puló waé kené jema
Jarang mepat taon sesérénen
Géh uren waé manut ku toa
I kala mampak agih si belem
Mórip pé genap si agih munge
Mampat di lingang ni gelumang
So mulingang iyup-iyup kuyu
Hék ku ampung gining ni ulu
Makin ku panang uwes aténgku
Mungkin ari si opat
Si paling mampat nosah neséhat
Kati mugerak mórip si garang
Kati putih raom si ilang
Kerléng tue…….
Kao serinen beyem tamok
Jema bergeli kite beramuk
Pejejém wan waih keruh
Ku caruti buet mu salah
Becaci kao gere le tepat
Caci ku jema kona ku diri
Kerléng tue. ….
Ampung-ampung pulo waé kene jema
Ke delé pé bahasa
Tutur mu singket
Gelah mu tetahmi mórip si ara
Buge bahgiemi ko i sara masa [SY]
Gayo 2025
