Salman Yoga S
Urum pekekit ni niaté kukirim bubuk ni kupi
Ari perempusen wih ilang toa
Rap urum arul badak dekat vilar uten rime
I baur kuduk ni koro mukarang pora
Arah mupenélúpen ike ari Takéngen
Isélé iwan belanga besi item
Berkeliliken tulu atu
Utem lúsik ari geris ni batang ni asam
Rara é gere bangur bere é mugegere
Kuaduk urum senuk ari almanium putih
Berger kayu
Ujungngé télak ralikké bulet
Itutu alus sawah mujadi tepung
Urum lusung mukelung ari batang ni pungkih
Bergeril bulet mampat lagu berpat
Bertarah urum parang canong
Si tejem lagu kul ni rinu
Kukirim bubuk ni kupi
Kering urum mencér mata ni lao
Isélé iwan belanga besi
Kuselé urum kul naté
Takéngen, 2022
*Dipetik dari Buku Antologi Puisi Bahasa Gayo “Belbuk”. Takengen: The Gayo Institute (TGI), 2022. Hal.14.
