[Puisi Bahasa Gayo] Datu Beru
Ibrahim Kadir
Urang Gayo enti ko lupen
Ini cerite wayo wo o
Datu Empu Beru
Kudedënang saying kudedënang
Sebujur Acih selintang Batak
Sejarah kolak ini kurentang
Kao urang Gayo nume le budak
Enti kao jangak wan urang-urang
Ke perin jema pé kite urang uten
Murungké-rungké asal keturunen
Denie Acih ni mulo kejadien
Datunte jemen pemulo mumancang
Sayang Empu Beru sayang
Empu Beru kuburmu
I atan buntul kubu i kampung Tunyang
Empu Beru kuburmu
I atan buntul kubu i kampung Tunyang
Empu Beru jema bijaksana
Reje ni donya kepala perang
I wanni sejarah nge cukup terhola
Béwéné bangsa mungaku terang
Sayang Empu Beru sayang
Masa jaya kerejeen Acih
Berganti silih musuh munyerang
Empu Beru si bijak terpilih
Kin ulu adi munamat jembolang
Keturunen ari reje Linge
Munatur siasat atan ni denie
Empu Beu siep sedie
Munamat puncé atan ni gelengang
Sayang Empu Beru sayang
Empu Beru kuburmu
I atan buntul kubu i kampung Tunyang
Empu Beru kuburmu
I atan buntul kubu i kampung Tunyang
Empu Beru selaku menteri
Kin Acih ni we si sayang bimang
I wanni sejarah nge cukup terpuji
Waé berani pekara munentang
Sayang Empu Beru sayang
Ari Ulung Gading i usung delé-delé
Eméh umuré i kampung Tunyang
Kona tube kené jema delé
Tapé kejadené ragu-ragu bimang
I hukumen pangkat ku reje Linge
Ari kin reje turun ku belang
Bukti sejarah ini ku kite
Enti cuge-cuge perin urang Gayo
Gere penah berjuang
Sayang Empu Beru sayang
Empu Beru kuburmu
I atan buntul kubu i kampung Tunyang
Empu Beru kuburmu
I atan buntul kubu i kampung Tunyang
Empu Beru kuburmu
I atan buntul kubu i kampung Tunyang [SY]
