Salman Yoga S
Kire-kire enge méh hal-hal siperlu ikunei
Renye kamipé betetah besinen berlangkah
Rupen mudemu ini asal kin tuah berkah
Kerna pepien waktu muselang ari tun oya
Keber pak Saifoeddin ulak ku rahmatullah
Semiang soboh kami i wan ni perjelenen
Asal tujuen malé ulak ku Kutereje Banda
Berdené terlangit temerbang atas ni emun
Renye selalu munuju ku Bandara Soetta
Ninget mien amanah den janyi si muloa
Malé démo i bunderen Hotel Indonesia
Gere isengeje kesempatan gere néh ara
Témul ide ari Agam Ilyas mubah rencana
Keta sire mujule Salman kite tetah cara
Purnama, Yusra, Rajali den Onot Kemara
Demo kite bueten i terminal Bandara Soetta
Dalih lemen-lemem genap kejebpé murasa
Mari oya Salman pé renye cek in ku owasa
Lime jema berkerawang lengkap betutup awah
Bergegenta kertas kolak bertulis bencana gempa
Musibah i Gayo den ibeberapa daerah Indonesia
Wo bapak presiden tolongpé iperhatin kune pora
Beta kire-kire isi ni tulisen kertas si terbaca
Ara téba kekata amanah ari korban bencana
Ari Kampung Serempah Ketol Berawang Gajah
Umahé murebah itimpei tanoh rapat hinge rata
Kamipé sesuk pejenyong gere berbasa
Kerkék kerkok ling ni kamera i foto jema
Gere taring Agam Ilyas pé gere mera kalah
Itetahé hapé canggih siara mu kamera kaca
Mari oya baro tetah langkah kusi rencana
Ara lime belas menit kami sigep berbaris
Sawah sara jema munamik ni pumungku
Itegunné ari arap ni terminal tangkuh
Kuperin akuni turah berangkat mukarat pora
Renye kené Purnama aku dih gantié keta
Rupen si munamik akune Pelisi Bandara. [Bersemet]
Takéngen – Jakarta – Bandara Soekarno Hatta – Tangerang – Sulawesi – Jakarta – Banda Aceh -Takéngen, 2013 -2021.
*Dipetik dari Buku Kumpulan Puisi Bahasa Gayo “LIKES”. Takengon The Gayo Institute (TGI), 2022.
