Akifa Nayla
Sara masa isara dusun ara sara keluarga si pemuripné susah giara mureta. Ama é sakit-sakiten, ine épé nge geride. Anak keluarga ini sisulu bere begeral Jerun dan engié geralé Bunge.
Sesoboh oya amaé ménét beh bejemur i alaman umahé nge mokot rebah entap sakiten belenye pé gere ter pérahé sebeb é entap sakit simunimpe é. Man seger serlo pé urum gadung rebus oya nge lebih ari genap.
Was ni aténi amaé bercerak
“Ari hé gadung ni sahan nosah hé ku keluargaku?”
Renye i talu aman Jerun anaké roanné
“Jerun, bunge kini mule nakku.
Musaut Jerun
“Hana ma? Aku tengah i dapurni. Kini mule! ihi tikonku? Aku malé bejemur i alaman ho”
Jerun pé perahié tikon ni amaé renye tangoné ku amaé. Jerun pé beniet nangon amaé bejemur. I kepété pumu ni amaé renye i papahé amaé ku alaman ni umahé. Jerun munéngon ineé urum Bunge géh i peger ni umahé sesiro munéméng keranyang si misi gadung urum awal.
Aman Jerun mongot néngon ton numahé urum anak benen né turah berusaha kati paké e nguk mujerang.
“Ya Rabbi… lindungi kami ari mara bahaya, i jegerko akui i jegeko keluargaku,” aman Jerun berharap sesiro berdo’a.
“Ama enti mokottu bejemur, kahé sakit ulume”, kené inen Jerun.
“Ine Bunge ku dapur keta malé nrebus gadung rum awalni.” Kené Bunge beluh kudapur ni paké é si masih paké utem.
Jerun pé malé ku empus nge siep urum parangé.
“Malé kuhi ko Jerun’?, kené aman Jerun.
“Aku malé nangkap aih ni pola kadang ara rejekite ama, aku beluhmi we ama kah.”
“Bohmi keta Win, arih-arih boh, semoga berhasil.”
Jerun pé salamé ama urum ineé renye beluh ku uten sidelé ijuk mȯrip. Jerun mengucap basmallah urum langkah semangat beluh ku tepi ni uten urum arul tempat ni batang pola mȯrip, i éngoné batang ni pola si siep i tetok. Jerun senang beh ate é, terbayang i was ni kekire é kero porak urum poén dengké kero é si malé i édangné ku amaé.
I dekati Jerun batang ni pola, sire bejangin nye becerak
“Semoga delé aihmu, i izinen aku mepok kumu mu, kati porak lo kahé amaku nguk man kero gere né gadung.”
Allamdulillah, aih ni polaé delé, senang beh aténi Jerun.
I mai é aih ni pola ku tempat penjerangen pola. Setelah demu sén 300.000.
Jerun pé selalu ku pekan i beli é oros, iken, gule, minyak makan urum uak ni amaé, wé pé serapah ulak ku umah.
***
Sawah ku umah i demué amaé tengah malang i kamar, i ceriten Jerun cerite é bepola.
“Ama, abang tah ni man. Alhamdulillah serlo ni kite man kero”, kené Bunge.
Sire beramat-amaten ku rering berusaha uwet Jerun mumapah amaé ku dapur ton kero berédang. Ama, ine urum Bunge besyukur atas rezeki si depet Jerun.
“Win maafen ama urum ine kerna ko nge kin pengenal belenye,” kené ine é sire besebuku.
“Ama, ine kam surge nikami dunie akhérat i maafen kami gilen mujadi anak semperne.” Kené Jerun sesire mongot.
“Ini nge semperne anakku, etahmi kite man Alhamdulillah nge néngon kero mien kite”, kené ineé si bijaksana urum beraté lemut.
Jemat Jerun nérah aih ni pola sesire ndérés getah ni uyem, giat beh wé berusaha, niet é malé i maie amaé beruak ku Umah Sakit. Adiké peh Bunge sibuk berempus si suené gadung urum awal i uduk ni umah hé.
Bunge i olahé awal ken kerépék urum gadung i titipné kerépék awal urum gadung i kedé kupi. Urum i kantin sekolahé kerna wé taring i Tepanyang. Berkat usaha ni Jerun urum Bunge besilo paké a nge guk man keru lengkap rum pongkero poén né.
Umahé pé renye i tetahi, tetapi sayangé amaé sakiten makin mu olok dan ineé pé renye rebah sakit. Amaé pé i sangkan ku Umah Sakit i Blangkejeren, selang serlo ineé pé mayo ku Umah Sakit seger inap sara ruangen.
Seminggu mari oya, amaé ulak ku Tuhen dan ineé péh munaringen denie jem 4 i lo si dis urum amaé. Gere terperin sedih ni Jerun urum Bunge.
Jerun urum Bunge nge ikhlas ama rum ineé nge ulak ku Tuhen urum até ikhlas urum do’a. Buge jema tueé mayo serge urum Rasulullah. Setelah fardu kipayah seminggu ku arap paké a taring reroanné, jep lo jemat Jerun urum Bunge ziarah ku kubur ni ama rum ineé.
Selanjuté Jerun urum Bunge nolah aih ni pola mujadi pola, paké a pé nuke kede i arap ni umahé i juel le kerépék urum gule panguh. Kedé ni pakéa maju barangé lagut den terkenal. Lokasi ni kedéé maju, barangé lagut dan terkenal. Lokasi ni kede e i jelen lintes utama Kabupaten Gayo Lues. [SY]
