[Puisi Bhasa Gayo] Ama
Hasrin Z Bersah
Ama
Bier i reringi baur si atas
Sabé we telas kasih rum sayangmu
Buge kami kasé lepas temas
Gere né melas kasé anak anakmu
Ama
Gere terseta rum kayu naru
Gere mera buntu kaol ni até
Mujadi petuah peri bijakmu
Kin penetah tentu kati temas kasé
Ama
Alak si mamur penekul ni kami
Buge mujadi sana sipinte
Doa sabé renye ku Illahi
Buge kasé lepas begune
Ama
Sara batang ari ama
Sara cabang we ari kami
Selues belang i jurah ama
Sekolak ni ulung penosah ni kami
Ama
Ku Tuhen kamipé muniro
Buge jeger kasé amaku
Lanyut mi umur jarakmi bele
Sabé bahgie iwanni muripmu
Timang Gajah, Mei 2014
Dipetik dari Buku Peri Berabun (Kumpulan Tengkéh Gayo) Terbit Tahun 2021. [SY]
