[Puisi Bahasa Gayo] Pengkhienet Marwah
Salman yoga S
Para penikmat damé konflik Aceh
Malé mulintesi jelen kul
Si penah mujadi kerne ni mét
Mulalui mata jelata den umah miskin si pasrah
Urum mugenei honda borjois jaket kulit benatang
Sekulitté rupe den até ni pakéa
Mesut ibalik item ni kacamata item
Bahwa kamile si saat konflik gere tersentuh gunah
Renye pasca damé malé pamer megah
Seulah si iyolah
Pengkhienet empati ari luke si ilen muperngah
Pendurhaka marwah ari sumpah wih koboh
Roda Motor Gede oya malé mubeltak
Kami mumengé lagu anak bedil si muletus temus
Sedang pakéa muangapé sebagé kekedikken
Si nguk ipumpah urum kuyu
Pengkhienet empati malé mulintes
Pendurhaka marwah murasa gagah
Sejarah mungédikkié sebagé budak mudemu lélon
Ulu den bedenné bergerak
Ketapé até wé maté
Jantungé muputuk
Utokké berok ni keramil
2020
*Dipetik dari Buku Antologi Puisi Bahasa Gayo “Likes”, The Gayo Insttitute (TGI), 2021. Hal 117.
