Oleh : Salman Yoga S*
Ari Empus Kupi Kutulis Puisi
Sara
Ari empus kupi kutulis puisi
Teridah ijo den lemi ni pucuk
Lagu tajuk ni bunge perasanku
Kemangni harapen itetunung galak
Likakmi kao betari
Mulentayonmi gernang ni repai
Kati céngkéh ni bulang putih jernih
Putih sawah ku tanoh suci
Vilar Wih Ilang, 2022
Ari Empus Kupi Kutulis Puisi
Roa
Ari empus kupi kutulis puisi
Teridah ijo den lemi ni pucuk
Lagu tajuk ni bunge perasanku
Kemang niharapen itetunung galak
Runcang itetunung likak
Naru di ilen rencana den kenak
Simen di ilen si pinte
Umah gere ilen munge
Anak tengah wan sekulah
Gegiriten kenakké mucacak
Tanoh sucipé niet nge mupacak
Likakmi kao betari
O sempur putih ni bunge ni kupi
Buge sawah sana si ipinte
Hejet mörip wan denie semperne
Kegerepé lagu jema delé keta gelah lagu ni kite
Ari empus kupi kutulis puisi
Teridah ijo den lemi ni pucuk
Sawahmi bang die tampuk
Kin tajuk kemangni iren-iren
Gengemen
Gayo, 2022
Ari Empus Kupi Kutulis Puisi
Tulu
Ari empus kupi kutulis puisi
Teridah ijo den lemi ni pucuk
Lagu tajuk ni bunge perasanku
Kemang niharapen itetunung galak
Runcang itetunung likak
Jerélék ni ulung nge mumeminyaken
Tangké muleno lagu ilengkung
Keromol ni mutik bulet mukoko
Tengah musampik ni emuten
Lekat wan ranting pejunté
Vilar Wih Ilang, 2022
Ari Empus Kupi Kutulis Puisi
Opat
Ari empus kupi
Teridah Rusia mujadi nege
Ukgraina mujadi kulem
Mujadi paya
Mujadi empus talu
Mujadi ume roh
Mujadi berawang keruh
Ari empus kupi macik pekekit geléson
Munéngon denie mukampanyenen hak asasi
Ketapé perang mujejadi
Denie munejeren mörip damé sesabi negara
Ketapé senjata lagu berahrum
Rerenye i rebus urum belanga kolak
Vilar Wih Ilang, 2022
*Dipetik dari buku Antologi Puisi Bahasa Gayo “BELBUK”, Takengon: The Gayo Institute (TGI), 2022
