[Puisi Gayo] Ari Gayo Atu Si Muatu

oleh

[Puisi Gayo] Ari Gayo Atu Si Muatu
Salman Yoga S

Atu den lumut ni lut
Teger iramas atu
Muatu iatunen atu
Mubekunen cataten i atas ni atu
Tentang riwayat peredeben den waktu
Ratusen tun silalu si beku

Gere ara polpén silepas munipu
Kin munubah madah gincu ruje belacu
Sebeb sejarah terkadang oloktu lugu
Iputer den i balik munalihen muasal hulu
Seakan matani lao ara mudes lebih ari sara
Kin kepentingen kuasa si sekejeb we mari oya layu

I guhe-guhe gelep i pucuk-pucuk den arul ni baur
Atu-atu gere mutumpuk-tumpuk ketapé sesuk suntuk
Mujege rege lapuk i tuyuh é sebagé penujuk anak panah
Bahwa isien bermaqam para penjelajah
Pencerah warkah sara ejeren mulie

I Linge, i pucuk-pucuk baur ijo ara atu teger ibedaki uren
Idedaring kuyu itasakni matani lao
Sara atu si henye bertulis sara syehedet
Pengagungen sang Khalik si ahad
Lurus témul rapi kaligrafi berpat kalimat tauhid
Syehedet si keramat

Atu den lumut lut teger iramas atu
Muatu iatunen atu mufosilen cataten i atas ni atu
Tentang jejak den perjelenen waktu

Gayo, 2020

*Dipetik dari buku”Antologi Puisi Bahasa Gayo – LIKES-“, Takengon: The Gayo Institute (TGI), 2021. Halaman. 69.

 

Comments

comments

No More Posts Available.

No more pages to load.