[Saer Gayo] Jema Mudelam
Aman Renggali
Delam mudelam ara isihempe den selohpe
Deba gere mubetih tempat urum waktu
Jeb ara peluang we mera mudedelam
Ike nesu nge terarap akal mera nome
Ate mukunci lale wan nipi
Den delahhe jege renye mudelap
Seolah munuruhen kul nate
Rupen ara simale ikenakie
Jema pendelap biasae semakin kul
Apalagi jema si delapni lale wan puji
We hadir lagu jema pane
Macam berbage si betihe
Muloi ari upet sawah ku keber
Macam sipuji bierpe lagu dengke gere musi
Asal jema senang itosse bage sigalak nate
Sawah hakikette we munuet untung wan rom songong
I arapte lemus den seolah patuh
Ketape i kuduk wae lagu tejem ni rui
Iwit urum tipak dagu nge kin basae
Asal niette gere ara len selain kune kati demu
Ilen waktu we mera sanahpe ikini
Tape ike nge si delap nge museltu
Wepe kabang gere mera tau
Jema mudelapni gere mera mate
Jep jemen den masa muubah-ubah bentukke
Hadir ku jiwe-jiwe ni pememimpin den jema kaya biasae
Si berjiwe sombong den soh ari ejeren agama
Miskin amat-amaten den mugile kin amuh ni jema
Kene jema tue jemen
Jema mudelapni lagu kintis
Isi ara manisen we tir jinger
Gere dalih berunger nge minter hadir
Den ara si paling sakit
Ike nge kering si delap
Jema pendelapni renye muneleh
I akherat puren oya tebetih
Delahhe naru lagu getih [SY]
