Ari : Quadi Azam*
Gere dele jema mera munulis berbahasa Gayo. Seni keta juge kurangkai tetikik wan kata-kata buge gere salah dan ikepe salah kire e kite nguk saling bersiingeten. Maklum delah gere bertulen bibir gere berdeku, ku tatang sepuluh jejari ku. Ike ara pe kase salah i wan percerakkan kuni, gelah kite bersimaaffen.
Aku meniro izin sebelemme ku empu ni sinte, Reje simutah si munemah rakyat e ari si geleb ku si terang, ari arul ku pematang, ari si porak enguk munetah ku si tawar bengi buge engok kire kase, sigati peberakah, mejen mera we nosah cumen sigatin ne osop-osop teles.
Tapi akhir-akhir ini kengon nge netos resah, gere mujadi panuten kupen wan morep kene teba, perilakupe nge mubah. Kunehmi keta, entap ni porak belanga, umah museyut. Entap kena kata-kata si mungarah ku istana, perangkam. Memang kam gere lagu jema pudaha. Bohmi.
Roa tun kurang lebih kam nge berumah tenge, waktu kam mari i luah hi zemen senyum-senyum pe dem mesrae. Pingen wan meja perasmanan dele gule, mehne sedep i awah, apalagi mangan sesire berberakah.
Cerak-cerak sawah gere bosan aku mumengei e, sawah timol amarah, boh kam pas simunetah baik wan panggung orom wan ume si gere neh tererah. Waktu oya akupe pecaya, karena jema si dekat meh murapat, iperene kam jema mampat gere nos kemel, orom bekemampuen memajukan negeri. Bohmi.
Roa tun kunampen, kengon cerite si mayope nge pelen bele, ku kunei ku jema, jewepenne lagu noya memang pakea. Jemen gere telas rupe, rupen nge i osan ukum e seni nge niro ulak.
Si beru kenake lagu jemen sebelum pas i osah ukum, si rawan kenak sesereng e kerna reta tengah dele i pumu. Jema nge dele enggeh, muniro buet orom jebeten, teba usulen hana si nguk ku bantu. Beta le cerite si ku penge, sawah ujunge turah we beloh i hukumen ku pelisi, munetah beta kedah.
Cumen jema tue si munerah kemel mejen, edet sebatas cerak, nume hakiket. Beta si ku penge. Bohmi.
Inuwow…..!!!! Empu bumi kunihmi kami ni. Reje ni kami seni tengah wan gasut, ike wan edet kami ara Sarakopat si saling mubantu meningetne. Seni kengon Petue pe sengap, senyum dan sebatas becerak. Kami tetahi kase ama/ine, beta kene, perene.
Pedahal wan fungsie ara si nguk i menalu secara paksa, kati pengei meh ni anggota Sarakopat. Rupen fungsi oya seni kadang lupe, entah ara ilen atau nge mosop. Kengon gere le, kena dele anggota sarakopat nipe morom sara tamunen, ulak sara loloten. Entah kedang memang Gere terang penerahen, tuli penegenen atau kena corona si munemah tereh. Bohmi.
Ama, inengku bebewene, seni nge kite erah reje wan batang ruang orom anggota Sarakopat nge sengap. Keta kune kite ni, kadang turah rami-rami kite geh kone, mungunei hanakati nos hamak wan batang ruang ni.
Atau rami-rami kite kunei hanakati gere erah kam so jema tengah wan bele, len si sakit, len si gere mume, len uah kopi si gere murege, len uten meh itebangi, len tambang nge male murusak bumi. Dele le masalah len si turah itetahi.
Inget kite turah berseingeten, ike kampe reje lagu noya, beta anggota Sarakopat pe, gelah nampen kami si memude orom bebujang kampung ni geh kone munetah, beta kata olehe. Brejen.
*Penulis adalah Penasehat Jang-Ko
