Karya : Erwin Konadi*
arani murip berpari nyawa
maha pencipta simunaturé
wan kandungen rembege iup nyawa
seluk musara semperne jadié
rembege silengkap anggota
amat murasa telas bentuk mampaté
simen nyawa gere tepanang nyata
iseléséi mata gere teréngoné
umur murip atani donya
bilangen ara mepat angkaé
simubetih Allah subhanahu wata’ala
insen mutaqwa siberuntung delé
pemulo turun wahyu iqra’
peréntah mubaca ilmu kin penané
Islam lempang sucini agama
masa kumasa sawah kuaheré
sediken perintah ari sisara
izrail nuet nyawa murebah jasadté
mubahni gerel tenalun mubeda
almarhum/mah asa oya pemarinné
kewajipen simurip kujenazah ara
opat pekara turah ibuetné
pemule munirin bersihen anggota
bersih rata gelah selesé
kedue ruje putih kapas iréda
saputé ara penikot rum perjuté
ketige semiyangen jenazah arapni jama’ah siara
sebelem oya ari keluarga niro izinné
arapni jenazah sesuk wakilah keluarga
mungakui utang siara ilunesen wajibpé
urum terang luahni kekata
kite petama pinte beruke alas bedenang peden kusijerohé
siterahir ikubumin kuruk tanoh bedo’a
urum cara ara luang letté
ukuren mét lepas itata
papan ara kin bentuk umahé
mujurah jenazah tulu sawah opat jema
mujangkopé beta jeroh parié
singkih kuen kukiblat mata
uken punyutéa siatasni ulué
luah siopat pekara
sara donya osop dosaé
fardhu kifayah hukum siara
demumi pahla siéhlas mubuetné
wan pekuburen deledi makna
pasti murasa kusimunyawa ilenné
gere tine kusesara jema
béwéné rata sawah kuhakiketté
simai kuahérat tulu pekara
siutama ilmu sibermanfaaté
kedue sedekah zariahé
ketige keta do’a ari anak amal saleh é rum salehah é
mepat kiteb arani al-Qur’an
kin pedoman murip idenie
beribadah istiqamah muamalan
pahla mupantan dené kuserge
amiiiiiiin ya rabbal alamin [SY]
