[Saer Gayo] Sejudu Pasang
Oleh : Hakimiadi Rawe
Isi keta jurah gere munulak
isi keta jangko gere mu nyintak
ralan turah bergerdak
kucuali sergak enti ikebecerak
Si keta ulen mucaya
terang wan kelem bute nosah cahaya
nti lupen ken jeroh ni bintang
sejudu pasang gere mukerna
Tetah penyemen kati belah ume
oya resam muyang ni datunte
ama demu pemen kami demu kile
oya le buet sinte mungerje
Langkah nikedeng nge museseltu
gere tetuju pulo harapen
wan jelen rata mitipak atu
mumakin jarak urum kebahagiaan
Jelen lintang mujelen naru
simen dele jema berdagang
nti kire mokot mu ate karu
sapehi turah konol wan ampang
Rebe Gedung, 2019
Hakimiadi Rawe adalah pencinta sekaligus pencipta puisi dan Saer Gayo dalam Bahasa Indonesia dan Bahasa daerah, lahir di Janarata pada 1987.
