Danisha Quinsy Assyfa Harahap
Lao terang munyambut serloni, si gere kalah cerah urum aténgku. Lo si serloni lo si paling ku nampi-nampi. Megang, kami munyebut é, serlo sebelum Ramadhan. Kusi ton istimewa wan lo si jeroh dan paling kunampi-nampi ni? ike gere ku umah ni anan. Umah ni anan bagaikan surge wan lo libur urum hari-hari kul Islam.
Kebiasaen wan ni keluarga ni kami si nge mujadi tradisi oyale megang murum-murum i umah ni anan ari keluarga ama, sedangkan keluarga ari ine taring i Kute Medan. Ama mempunyai roa adik si nge mehné mukeluarga, meski nge mukeluarga masing-masing, tradisi megang ni kami gere penah terliweten. Aku urum adikku si dor reroan we wan sara ine murasa senang urum keadaen umah ni anan si dor rami.
Umah anan si dor kin tempat ni kami keluarga kul mukamul. Umah terminal pemberhentien si kami talu kin umah tue ni anan. Umah si engkip urum sejarah, umah si aku dor teringet kin ulak kini mien.
Salah satu keistimewaen né adalah seperti si lagu serlo ini, kami berkumpul untuk munos makanen khas Gayo si i tos urum urang Gayo ni kami kin munyambut Ramadhan yaitu lepat. Masyarakat Gayo mungenal geralé secara lues sebagé lepat Gayo.
Aku mubantu anan untuk mumorak ni ulung nawal i rara. Ulung nawal si malé pakék kin balut ni lepat “Kati enti murébék pas kite pugegulung”, kené ananku.
Wan tengah mumorak ni ulung nawal, ling ni ine ternengé ari serap ni pintu penghubung dapur urum empus ni anan.
“Assyfa tulung pé belinen bahan-bahan kin munos lepat ku kedé o”
“Bohmi, ine…”. Jewebku sire mumungen buet ku i dapur dan mulangkah munuju kedé pasar Paya Ilang si i maksud ine.
Lepat ni terdiri ari bahan-bahan si dor kite demui wan kedé. Yaitu tepung oros, gule arén urum keramil parut. Proses é pé terhitung murah kin i bueten. Cara ni anan munos lepat biasa é tepung oros ni i campur urum gule arén si nge i campur wih rangat, anan munadukké urum pumu si nge mukerut tapi tetap teridah cantik wan mataku sampé alis é.
Nge kalis, i balut urum ulung ni awal si nge i poraken ku rara kati enti murébék kené ananku, gere lupen kin tetuke si nge i sedien ni anan yaitu keramil parut i campur anan urum gule arén. Pas anan mujerang tetuke urum rara sedang, enti kunei kune sedep aroma ni masaken é sampé menggugah selera sahen pé si necum aroma é.
“Anan kunehmi ya…,wangi pedi tetuke ni lepat a nan boh.” Kenaku ku anan si tengah munaduk tetuke ni lepat.
“Boh wet renye capir o kati i cube rasa é,” kené anan urum senyumen si dor ku érah wan salak ni anan.
Urum até galak ku wet capir urum cemca kin munyube tetuke lepat ni anan si sebelum é nge terbayang rasa hana si bakalen ara wan delah ku. Rasa sigere pas ku demu wan lepat ni sahenpé, selain lepat ni anan.
Aku mubantu anan, ine, urum ibi mubalut lepat si malé i rebus. Sesire mubalut lepat aku mungune ku anan,
“Nos lepat anan, bahan hana si paling penting nan?”
“Wan munos lepat bahan si paling penting nume tepung pak, melainken ulung nawal, kerna paké ale si mubungkus adonen ni tepung ni mujadi lepat.” Kené anan seulah-ulah mubaca pikirenku.
***
Rasa é gere néh seber aku mumangan lepat Gayo ni anan. Selaén i tos urum rasa manis dan gurih, munos lepat tun ni terasa lebih gure ari tun-tun sebelum é. Apalagi lepat ni makanen khas suku Gayo. Lepat si mumiliki arti pemersatu keluarga dan pemersatu masyarakat. Aku olok suka kin lepat Gayo ni anan urum umah ni anan. [SY]
Takéngon, Oktober 2024
Penulis si begeral lengkap Danisha Quinsy Assyfa Harahap. Tengah bersekulah i SD Negeri 9 Lut Tawar. Penulis lahir pada tanggal 19 Juni 2013. Penulis anak pertama ari roa besudere. Cita-cita ingin mujadi penulis, penyanyi, sekaligus aktris i suatu saat kahé. Memiliki hobi munolis urum mugambar.
