[Puisi Bahasa Gayo] Kutalu Geralmu Ama
Salman Yoga S
Wan uren mongotmu
Kati enti teridah luh mata mujairil ku daku
Wan bening bengismu
Kati enti tenengé i kemiring ni heme
Sebelem mis nome kao berpikir
Kati enti mutetir kul naté kin anak biak sudere
Kul ni beben lagu gere terjujung
Ari kucak lagu gere mera tumung
Si tar belenye si tar sekulah samung munyamung
Munimang lagu tingkah perangé berbagé
Ketapé gigihmu gere penah mumerin letih
Alak lagu muniri i perumpusen ume
Uren porak sehebet muketieri belenye
Demi kin kami
Si malé kin mata ni lao puren kasé
Kutalu geralmu Ama
Setelah mutulun kutalu geral ni Ine
Beta Rasul munosah conto si kul pikul i ulu den até
Imem semiyang den umah tenge
Simunarang tangungjeweb akherat denie
Kutalu geral mu Ama
Gergel teger, nami si bengi
Pemimpin setie, agih si hinge
Kutalu geralmu Ama
Lagu rembege urum nyawa
Kutalu geralmu Ama
Berijinku mutelege
Ama, Ama, Ama…!
Takéngen, 1997
