[Puisi Bahasa Gayo] Filsafat Ulu Ni Wih Fosil Mubeku

Salman Yoga S

Murapat wan lapis berlapis i relem ni tanoh
Sebagé makam sekaligus ton penanti ni jemen
Kao bermukim i tepi ni Danau Lut Tawar
Mengamulen mata ni wih den perdu-perdu belantara
Munanuten tulen kerlang uku siku
berebed-ebed usie
Munyesépi waktu kati nguk iterjemahni masa
Cerbéng ni keni sebagé tenaring ni peredeben
7400 tun lememmé bertapa
Muakrapi gue beratu kapur sebagé istana

Uwo jasat-jasat jiwe si muatu
Nge kami tangkup den gugu filsafatmu i ulu ni wih
Tentang edeb den jejak möripmu
Ari kebekuen kerangka den tengkorak
Si mumencér ni ilmu
Ari ongot den bisumu si munuke pintu waktu
Riwayat den hejet moyangku pudaha

Ceruk Mendalé – Takéngen, 2018