[Puisi Bahasa Gayo] Pacu Kude
Salman Yoga S
A a a a s a a l u u a a l é é é é
Ilang kuning ijo biru putih dan ungu bersidediken
salam den ahoi wiw ari lingkaren gelenggang musara alun munyintakni kesah
kude luah, berpacu lagu mungaro bersiulon-ulonen terarap
Salam berikut cerite tentang kude pacu si bedeséw keras
gere bepelana den sara rilah ulung ni belo urum pitu tampukké
si tumung gagang mengulum diri wan doa pelayang
selensung berbunge lawang
konyel ilang
kapur putih
bertih tunu
puh, puh puruhé musempur
Kelubung upuh panyang, upuh kerung den sipu senyum
temabur bunge-bunge ni kupi wan udara bengi Gayo
i ketinggien baur murenah ni emun
galak den tepok surak mujulen pengkalungni bulang ku langit
Ahoooi wiiiw kedik den pengkalungni senyum mumabukni beru bujang
kude renye musangka munaloi riuh surak mulawi mengipes kemenangen
Salam damé, salam Gayo raja gunung yang suci menggelar pesta bumi
negeri tembuni, ooo Pesaka Due Belas renye renyeeeeee
A a a a s a a l u u a a l é é é é, katak buntang ke ketol maté
kude-kude meringkik muhiheee
kude-kude mugireh gelana
gagah
*Dipetik dari Buku Serangkum Puisi Bahasa Gayo “Pungi Den Pakanlaya”, Takengon: The Gayo Institute (TGI), 2020. Hal. 420-43.
