Keysha Salsabila
Suasana i Sekulah Menengah Pertama Negeri 4 Aceh Tengah olok pedi rami. Béwéné murid rempak mumakék baju olahraga. Bahagie si teridah wan ni salak. Jengo si mah ari umah nge beténténg wan ni pumu. Serloni, SMP N 4 Aceh Tengah munaranen studi wisata ku Umah Pitu Ruang si terletak i Museum Aceh Tengah.
Bus Pemda Aceh Tengah si berwarna putih pé nge terparkir i elem-elemen sekulah. Siswa urum siswi si malé berangkat pé bebaris rapi, murid urum semangaté langsung munéki bus. Suasana i bus teridah rami, ara murid si tengah besene gure dan ara murid si becerite tentang hana si malé i éngon isoné kasé.
Perlu beberapa menit untuk perjelenen ari sekulah munuju museum si gere olok gip. Setelah beberapa menit, kami pé sawah i museum. Kami pé turun ari bus setelah bus terparkir urum semperne.
“Anak-anak, pastinen enti sampé ara barang te si taring i bus,” inget ni bu Nova guru pembimbing ni kami wan study tour ni.
“Bohmi bu!” jeweb kami urum semangat si menggebu.
“Pastinen anak-anak ibu mu mah buku cataten si nge ibu manaten mané, kerna kite malé munyatat hal-hal penting terkait Umah Pitu Ruang ni,” tamah bu Nova mien.
“Bohmi bu!” jeweb kami serentak.
Urum semangat, kami mayo ku Umah Pitu Ruang. Umah si kami érah tampak megah rum belangi, arsitektur ré mucermin nen kaya ni budaya Gayo.
I sekiter ni Umah Pitu Ruang, bunge-bunge mȯrip urum suburé, bunge si munamah belangi ni museum.
“Fira, cube éngon lukisen si rering paling atas o, cantik pedéh ke,” kenaku sire munuruh lukisen si muniasi rering ku Fira salah satu pong ku i umah sekulah.
“Betul geh, teku ini ku éngon asli lukisen lagu noya cantik é,” jeweb Fira urum mata si mubinar.
Kami mulangkah lebih gip ku was. Bu Nova mujelasen sejarah dan konstruksi Umah Pitu Ruang sesire remalan.
“Pembangunan Umah Pitu Ruang ni i pimpin urum ahli bangunen. Sibertugas mempersiepen alat bebuet lagu tukul, mesin cekéh, urum pat kin mubentuk tiang urum kité.” kami urum seksama mumengé penjelasen ni bu Nova.
“Bangunen ni i mungen sara keluarga wan sara dukuh i tuyuh pengawasan ahli. Bahan bangunen si pakék kin Umah Pitu Ruang ni oyale wé urum jut. Bahan ni i pakék kin penikot ni komponen bangunen né, selain oya uluh urum uyem kin bahan dasar ni lanté urum tiang.” Lanyut bu Nova.
Kami mumengé seluruh penjelasen si sawah ni bu Nova ku kami. Hal-hal penting si terkait Umah Pitu Ruang kami catat wan buku si kami mah ari umah sekulah. Selanjut é kami munuju ruang tamu. I ruangen ini aku olok terpesona kin detail ni arsitektur urum ukiren Gayo si olok pedi mampat.
“Ukuren lantai Umah Pitu Ruang ni pé terbilang unik. Ara opat tiang kolak, dan tulu i antaraé ukuren opat meter,” jelas bu Nova sire munilok ku tiang-tiang kul penupang umah.
“Joh kerén é né boh…, kul-kul pedi tiang é,” ucep Fira sire mugegining ulu.
Selanjut é, rombongen ni kami munuju ku arah bagien arap ni Umah Pitu Ruang. Letak ni kite ara i lah-lah bagien timur bangunen, ara roa tiang i geralli sebagai tiang reje urum tiang puteri.
Bu Nova mumimpin rombongen paling arap sire mujelasen Umah Pitu Ruang.
“Pemasangen roa tiang ni i balut urum acara mugelih kaming urum koro.” Jelas bu Nova sire munilok ku roa tiang i serap é.
Kami mulanjut eksplorasi ku bagien was ni umah. “Umah Pitu Ruang ni memiliki pitu ruang si terdiri ari roa ruangen kul si i sebut lepo dan lime kamar si bejejer ari bagien arah rering timur,” Jelas bu Nova
Sesara kami munyatat informasi penting ku wan buku cataten.
“Jadi lepo adalah ruangen si paling renah lanté wé dan i pakék kin berbagé kegieten keluarga bu?”. Fira mungune urum rasa penasaren né ku bu Nova.
“Betul pedéh,” jeweb bu Nova. “Bagien arap ni lepo isebut anyung, ton jema tue banan urum beberu, dan i yoné juge i pakék kin dapur penjerangen.” Lanjut bu Nova.
Kami takjub kin Umah Pitu Ruang si kami éngon, kami mungagumi jep detail urum fungsi-fungsi ruangen si ara wan Umah Pitu Ruang, lagu ton nomé pasangen urum anak kucak é, dan ton pengemasen barang-barang pribadi ni reje kala oya.
“I atas ni kamar ara ton pengemasen barang-barang penting, si i geralli para buang,” tamah bu Nova sire munilok ku ruangen si ara i paling tuyuh.
Kami merasa kagum dan takjub oleh kekayaen budaya urum tradisi si kami depet i Umah Pitu Ruang. Bu Nova menutup penjelasen sire muninget ni kami bahwa Umah Pitu Ruang ni adalah warisen si turah i jege dan i lestarinen.
Nge pues kami berkeliling kami berkumpul i halamen arap ni ruang untuk munuwet foto murum-murum. Study wisata si serlo ni nume sekeder berwisata, tetapi pengalamen murege si kami demu akan kami kenang bersama, kami ulak urum rasa bangga sebagai generasi penerus si nge siep mujege urum mulestarinen warisen budaya Aceh Tengah.[SY]
SALAM URANG GAYO!
*Keysha Salsabila biasa i talu Acca. Bersekulah i SMP N 4 Takéngon, kelas VIII. Lahir i Takéngen pada tanggal 23 Desember 2012. Bercita-cita mujadi sastrawan. Hobi membaca urum traveling.
