Oleh : Hafiza*
Wan sara lo aku urum keluarga beluh dediang. Waktu oya ben mari reraya, kami beluh ku Danau Lut Tawar. Malé beluh kami munyiepen nemah si kami mah lagu, panci, piring, alas nye le mien nemah si lén né.
Waktu nge yakin nemah nge méh murum renye i téngoli ku atan motor nye i susun gelah jeroh kati lulus béwéné nemah né, méh oya kami ari Pondok Baru beluh ku Laut Tawar. Sawah i teritit motor si kami tik i si bermerék terkenal tun 90 ni teduh malé mu beli penan, jajan, goréngan urum minum, nge irasa belenye nge méh genap, renye kami berjelen mien ku Danau Laut Tawar si ara i Takéngen.
***
Sawah i lut, kami murum-murum munoroni nemah si nge kami mah ari Bener Meriah atan rombongen ni ara roa keluarga, keluarga ku urum keluarga ibi adik ari ine, i geniring lut dekat Hotel Renggali mujadi tempat kami mudenang alas. Kami mangan murum sire becerite gure renye kedik murum-murum.
Aku beluh ku sagi kuen malé mu nekik gule urum ama nye abangku, kona gulé wé gere oloktu kul gere olok tu pé kucak. Nong kona gulé wé lime, sire kunul i geniring lut sesire mumanang wih urum pemandangen né.
Rabbi belangi é penosmu, berijin kin anugrahmu ku kami
Kagum urum bangga kin Danau Laut Tawar si belangi urum delé hasillé untung pedéh kami lahir urum kul i tanoh Gayo, méh oya aku mu ngésépi gulé si kami nekik sine.
“Wendi orépen rara kati kite tununen gulé ni.” Kené ama.
“Boh mi ama.” Kenaku.
Urum adik sara nénékku Johan mu norip rara renye mu nunu gulé jahér si keluarga ku kik sine.
“Ino bau sedepé guléni, nge ke ara tasak.” Kené ine urum ibi segerak sesire kedik murum-murum.
“Ine urum ibi seber sekejep, kasé kami édangen atan pingen,” kenaku urum semangatté.
“Kune nge rujak ne ibi kul?” Kune i Johan ku ine ku.
“Oya enti i kunei siep-siep kené ine urum semangatté.
Ongot sejeb, nye kené ine, tapi turah i tempuh hi urum adik-adik mu si beberu sedang ni kami kedik mumengé berakah ni ine.
Nge tasak gulé si kami panggang ni urum rujak si nge i urum rujak mungé i parut i boh awasé renye kero pé mesiu kami béwéné mangan ruhul murum-murum i pinggir ni lut méh oya kami pé teduh sekejep sesire semiang berjama’ah i mesjid si ara dekat lut.
Kami dediang nye ibi ine ni Johan ne pakatié kami foto murum-murum sebelum ulak ku Bener Meriah.
Gere terasa lo pé nge jem 16 Wib waktu é malé ulak kami murum-murum mubersih tempat mumanggang gulé ne.
Kami kunul-kunul sire munekar sampah ku ton sampah si nge i aran oleh pemerintah Daerah Aceh Tengah. Kami pé ulak beriring urum mata ni lo si malé gelep.
Sebelum sawah kami ku umah ku Tanjung Pura i daérah Pondok Baru rombongen kami pé néro turun malé mangan bakso i Cindelaras.
Lao olok pedéh sejuk urum kuyu jadi bakso é kami bungkus dih kasé sawah i umah baro kami pangan. Ari Ponok Baru motor kami nge mayo ku jelen kampung ni kami.
I perjelenen engkip urum empus kupi den asam keprok. Alhamdulillah kami sawah urum selamat.
Béwéné rombongen si urum jemane nomé i umahku. Ben we i tutup pintu umah renye géh uren metuh ku séng umah ni kami. [SY]
*Penulis bergeral Hafiza sekulah i kelas 3 SMPN 2 Bandar. Lahir tanggal 19 Juni 2010 i Kampung Tanjung Pura, Bener Meriah. Anak ari pasangen Muhsin rum Saraiyahni bercita-cita mujadi pengusaha.
