[Puisi Bahasa Gayo] Ber-Ine Ku Ulu Ni Wih
Salman Yoga S
Tanoh ku tanoh
Wih ku emun
Kesah ku kuyu
Rara ku bere
Uyet ku ulung
Ulung uyet emun uren ku tanoh
Den aku ku Rab
Uten le si mungamulni kedut
i rubu kerlang kuduk ni baur
munyemé uren mujadi keben si sejuk
uten rime mujadi blang naru
pemanang muakrapi kiding ni langit
jarum jemarun kerpé mutamas geniring ni baur
lagu ine mude si malé malang
ari habbah uten den dengét ni ranting tue
lurus menilokk mata ni lao
betari lemut mujele kelamun
Temerbang ku langit
Manut ku toa
Nawé ku lauten
Buntang ku atas
Munusu ku ine
Si umah berumah segele berkah
Si muroroh tanoh
Serge si ijanyin Allah
Takéngen, 2018
*Dipetik dari buku Kumpulan Puisi Bahasa Gayo “LIKES”, Takengon: The Gayo Institute (TGI), 2021.
