[Puisi Bahasa Gayo] Gempa Maroko
Salman Yoga S
Denie mengut muguncang
Tanoh lagu demsi ayak
Itetapi wan niyu tanoh rata Islam
Umah atu muloténg mutetingket
Gedung bersupu kubah den langit
Rapat ku tanoh
Ruluh ku tuyuh
Mucerun ku paluh
Gempa berkekueten M 6,8 kené berite
Muguncang i Maroko
I Afrika bagien élopen
I ketike lao Jumat tanggal 8 ulen siwah tun ini
Kedemu berite mamur lauh ari mata
Cobaen lagu i Gayo tun 2013 silalu
Mesjid mersah
Umah sekulah retak mupecah
Mubelah demsi tengkah
Lebih ari 2.122 manusie méh nyawa
Den 2.421 jema mi luke-luke
Anak gerene berama den simen jema osop reta
Denie mengut muguncang
Tanoh lagu demsi ayak
Itetapi wan niyu tanoh kolak negeri Islam
Maroko
Mukoko sibersebuku
Muderu repuk niharapen
Berédo si kenak mubantu
Denie Islam ku musilu
Wan doa-doa ku luhkmahkfudz
Seber ko até
Kuetko imen
King ko tali niaté Islam denie
Gayo-Kutereje, September 2023
