[Saer Gayo] Kalam Peringeten

oleh

[Saer Gayo] Kalam Peringeten
Tgk. Mudekala

Gelumang tujuh ini kusederen
Kin inget – ingeten gelumang pitu
Sara pepatah ini ku perin
Ku atas pemimpin baring sahan tengku
Gelumang pitu turah i rasa, ku atan ni jema si mujadi ulu

Yang pertama rugi belenye
Nan pé yang kedue beden payah demu
Yang ketige kona pitenah
Ke empat mutamah buet diri padu
Yang kelime wé kona caci
Ke enam wé menjadi ber até karu
Yang ke tujuh i deye setan
Depet miyen wé kona ganggu

Si pitu perkara turah i rasa
Oya le makna gelumang pitu
Si pitu perkara ke lepas ilewen
Selamat berjelen mungayuh perahu

Ke baréng sana ara perpakatan
Wé i bubun kin kepala ulu
Semisel jema menjadi reje
Turah i cube gelumang pitu
Menjadi reje olok di sakit
Merasai pahit lagu empedu
Mikiri rakyat wan kampung
Kune kati beruntung kune kati maju

Konot ni cerak singket ni peri
Ike mujadi kin kepala ulu
Ke baring sahan jema manusie
Turah i cube gelumang pitu
Ike gere beta nguk i perinen
Gere jadi ilen kin kepala ulu

* Dipetik dari buku “ Saer Gayo” Mudekala, 2002. Hal. 15. Disusun oleh: Aman Ona Fithry-Inen Ona Fithry.

Comments

comments