[Puisi] Tsunama Tsunami

oleh

[Puisi] Tsunama Tsunami

Salman Yoga S

TSUNAMA TSUNAMI 1

Subhanallah …!
Negeringku muropa
Terdampar wan maha kepedihen si mungeringni laoh ni mata
Setelah puluhen tun gere penah kedik gure urum sejarahé
Séni isempernen urum pemutihen dereten
Subhanallah

Khalikul mulkussamawati wal ard

Banda Aceh, 26 Desember 2004

TSUNAMA TSUNAMI 2

Si kubetih bumi dem si guncang
gelumang item mugegulung atas
seketike umah-umah lagu betari
kuéngon-éngonen ratusen jema mutauk sarik sarul
musangka den maté
muropa langak mumedeti bumi

Banda Aceh, 26 Desember 2004

TSUNAMA TSUNAMI 3

Guncang ni bumi nge itimpanen ku umat Nabi Su’ib
atas segele kezalimen, keingkeren, mungurangi takaren wan juel beli
gere mulaksanan perintah den mulanggar larangen-Mu

Gesek tapi ni bumi si dahsyat nge turun Ko-pé
ku kaum Samud umat ni Nabi Shaleh urum ribuen korban,
sebagé petaka murka-Mu atas keingkeren ni heme
ku sesama den lingkungen dirié

Nyawa murengang wan sepit ni wih lut bengis
si isirem-Ko ku umet Nabi Musa
sebagé kekuasaen-Mu si nge iuwet ni manusie

Umat Nabi Nuh betawe ianut-Ko maha banjir si gile
den munyelamaten sara perau ari kedik olol den hine umatté
serta seribu bele bencana iturun-Ko ku Abraham, Namruz
umet-umet lénné i atas denie

Ya Allah
petaka gempa den gelumang ku umet Muhammad ni
nge genap munos kami jere
Acih nge semperne hilu sepertige pendudukké
terimemi tobat bumi
terimemi ampun negeri
ya rabbal’alamin …

Banda Aceh, 26 Desember 2004

*Dipetik dari Buku Puisi Bahasa Gayo “Pungi & Pakan Laya”, The Gayo Institute, 2020. Buku dapat dipesan melalui WA: 085333846973.

 

Comments

comments