[Saer Gayo] Suret Al-Kausar
Tgk. Khalidin Kemili
Suret Kausar sunguh singket
Tulu ayat mutingket tingket
Tafséré lues musemet-semet
Penuh hakiket firman ni Tuhen
Iwan suret Kausar ni singuk kite uwet
Pertama nikmat sigere tersuket
Kedue semiyang siturah iperbuet
Ketinge inget turah berkerben
Yang keempat jema siberbenci
Situkang upet situkang caci
Situkang fitnah si hilet dengki
Tuhen menjanyi celaka puren
Ike si hilet dengki enti kite takut
Renyel berjihad enti kite surut
Sawah si benar si batal manut
Si torah muhujud hukum ni Tuhen
Nikmat ni Tuhen sigere terbilang
Panang ku langit mu bulen bintang
Iéngon ku bumi wih mu berawang
Oya nge terang nguk ipergunen
Ijadin Tuhen gelep urum terang
Uwahni kayu nge ijo ilang
Lemak lungi batang mulingang
Gerené kurang pemanganen
*Dipetik dari 22 baik Saer Karya Tgk. Khalidin Kemili, “Syair Gayo”, Takengon, 1976 [SY]
