[Sastra Gayo] Hayatun Atun
Kin Engi
Engi, nge kite muloi rum bismillah
mu ikot nge janyi wan sara kalimah
jurah beterime tiro beserah
sijarak i mata sé nge teridah
Engi, ikhlas termulo réla nge turah
setimang pasang sepupu sepapah
gerené basah wan lóding serlah
gerené sesilon wan porak munyerlah
Engi, jangko ni pumu merawe gere sawah
si arap ni mata arawe gere teridah
si kite amaten mejen kasé muluah
kire gere sampé kenunulen mupinah
Engi, si kite lalui nge kin kisah
pait lungié nge murasa ku awah
enti ne bimang osopmi gunah
tali si kite ikot kire gerené muluah
Engi, taon mungadu ku kao turah
pongotni sebuku simejen sawah
kering ni tanoh gerené mucerah
nami siturun nge munemah tetah
Engi, bersiingeten kite ike ara salah
bersitunungen kite orom-orom munetah
ike kin kurangé kasé betamah
keta ike lebihpé gerené i sikah
Engi, kusi Sara kitepé berserah
sire muniro sabé ku Allah
si kite pinte buge kire sawah
bahgie mórip gerené mupisah [SY]
Takengon, 31 Januari 2016
