Karya: Win Ruhdi Bathin (WRB)
Diterjemahkan Kedalam Bahasa Gayo Oleh : Aman Renggali
KUBAYANGEN jema rawan urang Rusia wa lagu gere bijaktu, gati di ku éngon wan film-film si tos Amerika. Tapé gambaren oya osop mari mudemui Ketua Palang Merah Rusia ini, rupen pakéa ramah-ramah. Wan até-ngku munyarut, Amerika bélék, entapni filmmé penilaienku mujadi salah. Lewen ni Amerika ni igambarné unang gere jeroh béwéné. Akupé mejen ménét munonton film si tos Rusia, kunede penggambaren Amerika i mata ni urang Rusia. Ara kedie ge?.
Wé bekas veteran perang Afganistan berpangkat Letnan, senyumé ramah munéngon aku sawah ipongni Alevtina.
“Nge kupengé ari Alevtina bahwa ara sara pongngé isien. Tapé sesuei urum prosedur, aku turah munérah den mubetéhi identitas ni kam”, kéné Michael, Ketua ni Palang Merah Rusia wa. Kamipé kunul demu arap i sara meja kolak si mumisahni kursi-ngku urum kursié, kursi ari plastik.
Kutangkuhen id card-ku, walaupé sesunguhhé sebelemmé jarang we kuturuhen bene kucak atawe kertas sedemak oya ku jema. Bierpé masa Darurat Militer i Acih tengaha, si ketat den béwéné berbau militeristik. Sebagé jurnalis aktif, aku tentu seje mubetih si munos keputusen ketike konflik a. Jema si ara i atas atawe si ara i tuyuh.
Michael kemudien mubebalik kukuwen-kukiri, ku atas ku tuyuh id card-ku den kemudien munulakné ku aku sire berucep.
“So you work for daily news?”, pengunenné
“Yes”, jawebku singket.
Kuceriten ku Michael kune gabukké Acih sebelem gempa den gelumang Tsunami si kemudien mujadi titik pemulo kesepakaten damé.
Sesunguhhé hadirni Michael ku Acih kerna roa peristiwe ini. Konflik den Tsunami. Kunei Michael, sesi i antara si roa peristiwe buruk ini si lebih mupengaruhi Memorandum of Understanding (MoU). Gere ku jeweb, reroan kami bersiéngonen mata.
Kemudien ku uleken pengunenné oya kowé. Jeweb ni Michael kerna Tsunami. Excactly!. Konflik Acih berlangsung hampir 30 tun terakhir. Wan 30 tun oya gere ara si berkekire sunguh munos boh kune kati negeri ni damé.
Lepas ibayangen kune rakyat Acih bertehen i wan konflik si naru lagunoya. Munehen perasaen sakit wan si roa wa. Roanné berbedil den nguk munetus ni uluni jema. Tsunami le si lebih munos delé pihak kunul wan sara meja. Kerna Tsunami juge si simen mugulung ni biak sudereni si berseterua.
Tsunami pule si muhadirni semayang gemasih kemanusieen rakyat denie, kerna ezeb den musibah bencana alam. Sementara konflik Acih i anggap masalah wan negeri si gere nguk i campuri urang asing.
Bagi aku, Tsunami adalah bahasa Sang Khaliq. Kerna menéngon bahasa pelitik i Acih nge sedemikien olok murémok den degenen. Gere peduli kin penderiteen ni rakyat Acih si nge i sumpahi kati temas morippé. Den Tuhen munuruh ni kuasa É.
Kuperin ku Michael, ara upaya i Acih ni jema-jema si murasa muwakili kenak ni rakyat, enta rakyat sesi “mumaksa” kune cara munosan amanah ku “pakéa”. Amanah paksaen malé mujadi ulun tawar atawe pemimpin “iosan” ku pakéa. Meski caraé gere néh halal. Jadile perang sudere. Bahkan perang antar suku.
Perang sudere ni nge delé mujaril ni rayoh, luh mata, asap den dul ari bangunen si muséut. Oya gere ilen kesepakaten jahat juel beli bedil den anakni bedil i antara para pihak si berdewe ni. Mumérah keuntungen kin seseréng den kelompok dirié demi repie iwan tengah perang a.
Ike le rakyat jelata kedepeten munosah ku si separatis, nguk ipastinen, mujadi mét nye itekarné ku ton jema rami sebagé shock therapy. Sara basa si gere becerak munebar geli naté den kekueten urum pelaku si gere ibetih. OTK, kené, (Orang Tak Dikenal).
Sementara ike itelisik secara derhal den administratif, nguk iperikse rekening ni para pejebet atawe pengusaha Acih, kusi den sa mpué anut den mujarillé?. Gere ara sibertindak profesional lagu noya, béwéné henye kerna mukerna. Iselamaten nyawa urum beking den sén kerna kematien den sepatu lars atauwe bekas tapak ni kédéng, mera timul selo kenakké. Mumakék mandat “ilegal“ Izrail atas geral ni negara atauwe kelompok. Menempot kesah ni jema si gere ilen saatté, urum timah porak, i gelih atauwe iangusen urum umah-umahé.
Ekonomi hancur, termasuk sarana den prasarana umum si iséut atauwe i gergaji. Sesabi ethnis si mórip i Acih sabé wan curiga den saling penanti mubueten sebelem kona buet. Keluarga si ara mu riwayat salah sara jema anggota keluargaé munjadi pemberontak i intip-intip den i mata-matai.
Demikien juge Kampung-kampung si delé mulahir ni pemberontak ianak udenen pembangunen daerahhé, den dor wan mupelanting sehinge munimulni denem geli naté ku negara, den mulahirni kekanak atawe generasi ayu berayoh pemberontak.
Michael, munanguk-aguken ulué. Iceritenné ku aku bahwa nge mari Rusia Raya ruluh munjadi cerbéngen negara ayu si dis urum urang den agamaé, seni pakéa tengah mubangun mien sistim perekonomien lebih maju den demokratis. Bahkan mujadi negara kindiri.
Ternyata, kené Michael, pelitik pumu besi serta perinsip kekuasaen bagi jema si deléné, gere dor den selamaé jeroh den efektif. Kuncié adalah keterbukaen den demokrasi, jelasni Michael. Kuperin mien ku Michael bahwa i antara delé ni relawan urang asing, aku gere pecaya ike pakéa relawan sesunguhhé.
Mungkin i antara pakéa delé si intel atauwe mata-mata, enta mungkin misionaris. Selama ini gera ara jelen mayo ni urang asing ku Acih ni, Tsunami munuke ni peluang oya. Apalagi potensi Sumber Daya Alam (SDA) Acih si delé ilen gere ilen témul ari wan tanoh serta wilayah Acih si strategis sebagé basis pertehenen militer asing. Sumber Daya Alam (SDA) nguk i jadin kompensasi ari bantuen si iosah urang asing a. Isi kin ara mangan ruhul si gere ber bér.
“Nguk seje kam jadi salah satué wan oya”, ungkepku lepas ku Letnan Rusia ini. Alevtina gintes, aku senyum we, demikien juge Michael.
“Hahahaha…..”, kedik ni Michael luah lagu gere mumasalah.
“Gere, gere Win. Aku gera ara mu misi den mumaksud lagu noya. Kami sibuk wan munetah ilen. Mungkin negara lén”, kené Michael mien sesire kedik. Ikunehen malé, pumu i tuyuh.
Ku Michael ku perin bahwa Acih nge lemem mubetih Rusia. Bahkan mungkin mulebéhi ari urang Rusia wa mubetéhi Acih ni. Mokot sebelem saat seni. Seulah gere pecaya, Michael lagu bepikir, seliben mataé nik ku atas pora. Tapé gere demué jewebenné.
“Kune kati nguk beta?, kam i Acih ni lemem nge mubetih Rusia”.
“AK 47 den 56 kam empué. Gip temerbang hinge sawah kini”, kenaku.
Luah mien kedik ni Michael lagu gere mumasalah.
“Ya…ya…ya!”, kené sesire kedik hinge teridah béwéné ipon arappé.
Enta kerna olok galakké atawe kerna alasen lén gere kubetih, Michael menawaren wine penosni Rusia si kadar alkohollé sawah 40 persen, si itos ari anggur murni. Wan botol ilen si aslié, teridah elegan den megah bertulis urum bahasa Rusia.
Ku tulak den kuperin ménumen beralkohol haram kin jema Muslim lagu kami ni. Sesire senyum, iteber ni Michael mien cerutu si ukurenné pora lebih kul ari ine ni pumu. Tentu seje kuterime tawaren kedueé ni. Kerna memang akupé “ahlul hisab”.
Itangkuh ni Michael Zippo warna pótih bersih berbahan stainless ari wan sakkké den munekésné ku rokokku. Ku séluk relem asap pemuloé.
“Hukk hukk hukk”, aku matuk kona asap cerutu ni Rusia ni.
Si kedueé ku isep mien. Langkah ini lebih jeroh kerna gere matuk néh.
“Wow, not to bad”, kenaku ku Michael si juge munikmati cerutu sesire tersenyum den mupepienen mudegot ni anggur penosni urang Rusia wa.
”Kune urum genye Win?”, pengunen Michael. Senuen ini mórip subur isien, bejuel beli i black market. Nume urum oknum masyarakat pelin, ketapé juge oknum-oknum lénné si nungerte penegak hukum.
“Tapé aku gere munisep genye”, kenaku sesire munatangen pumu ku atas.
Nge mari cerak-cerak ku ujung kuralik den nge mudemu ijin ari Ketua palang Merah Rusia wa, akupé beluh nye rum Alevtina. Sebenaré, aku ragu ilen kusi demalé kumai Alivtina ni. Uluni kenderaen kuarahen ku arah Ulheelheu. Alevtina kunul lagu jema rawan i kudukku. Wé pakék seruel naru, tas kucak berisi kamera digital. Wukké berikot ku kuduk.
Senaru ni jelen, ku cube munyeriten ni gempa den Tsunami si monos tepur hancur ni Acih hinge mulahirni simpati ni denia. Termasuk Alevtina ari Rusia. Kerna mujelasné ari atan ni kenderaen honda si tengah remalan, lingku lagu kurang jelas pengé é.
Gati Alevtina berucep, “sorry” sesire mudekatni rupeé ku rupen-ngku kati terang mumengé sana si kuseder. Kenderaenpé kuteduhen persis i bekas pelabuhan Ulheelheu.
I sien, aku lagu mupantik ku bumi, pebening sekejeb seketike. Muninget mien ku kuduk sepersekian detik. Mubayang rupe lembut ni abangku si osop urum gelumang ni Tsunami, den hinge sawah seni jasatté gere penah demu ilen.
Gerallé bang Agus, wé bebuet sebagé kerani i Polda Acih. Gere terasa den gere kuderi luh ni mata-ngku mujaril, munétés ku dagu. Muninget kin abangku si lemut oya. Abang si gere penah olok becerak den mórippé sederhana we, taringngé i genéring ni panté.
Koné gati we aku singah ike lo mingu. Sekeder teduh ménum kupi Gayo atawe mudoran gulé jahér i wih ni paya kuduk ni umahhé, gulé oya ike kin paké pesisirni gere olok igalakié. Gulé ni mu bau angir pora akibet wih ni paya. Dang-dang pubebeta, kudaten Alivtina belélon urum kameraé []. Bersemet…
– [highlight]Alivtina [2][/highlight]
– [highlight]Alivtina [1][/highlight]
