[Puisi Gayo]
Kul ni Até Ama Inengku
Junaidi Yahya
Kaol ni atému Ine kin aku
i wan porak lao sabé munatangen pumu
kaol ni atému Ama kin aku
suntuk senye lao i wan empus ume
Laohmu remenang mujaril ku dagu
bené ni senyummu taring sebuku
Paét ni ungké manis ni madu
gere néh murasa i wani delahmu
alak nge rembebé i atan ni bedenmu
ku-Tuhen mungadu ton musilu
Delédi nge jerih payahmu
deledi nge budi jasamu
gere terbilang gere terbeles aku
ku kao Ama Inengku
Sabé mumérah belenye munguliah ni aku
buge selalu mununtut ilmu
buge kin sesérenen puren i masa tue mu
buge kin pelongohen kelubung ni ulu
i masa senye mu Ama Inengku
semiyang den galak besenemi dih urum kumpu [SY]
15 April 2011
Junaidi Yahya, mahasiswa Gayo di Jember Jawa Timur
