Amalah Kenawat
Kampanye Parté
Lao nge dekat ruhul
kite galip gamal gimul
jema nge uwet uwet kunul
sesire kampanye mujuel cinul
Seni si untung abang tukang becak
kuso kini munemah galak
sesire mah becak wé besesurak
nemah gambar ni caleg déba kucak déba kolak
Si mekat balon keta lén mien
gere né peduli si kiri kuen
kenali kekanak isi kin pengerjen
kati lalé ike nge ara lélon
Si paling untung tukang sablon
spanduk i cetak berbagé model
stiker bepasang nge jep peger
ara si wan begen téba betémpél
Si mumotor pick up si paling cerdik
tue mude i kéni nik
besurak galak sesire kedik
gere mu betih ujung enta sana ralik
si penting nguk ber galak kedik
Aha cara ni kampanye berbagé-bagé
oya nge sara sistem ni parté
i uyahen jema bererami
unang-unang olok rami pendukung é
Gere i pikiri kalah ataupé si menang
si penting bergegalak até senang
ike puren kalah keta mugulang
taring mumikiri sidah jumlah ni utang [SY]
Takengon, Maret 2014
