Khansa Syaqira
Hawa sejuk munyelimuti kute Takéngen. Luding turun ku bumi tikit demi tikik. Emun si mulo é mukumpul i langit, séni nge mu tumpah ruah ku tanoh-tanoh si mule é kering, munos suasana semakin sejuk.
Naina besekulah i SDN 9 Lut Tawar, séni kunul i bangku kelas lime. Naina adalah beberu sedang si supel den ceria. Ruhul ni, wé berencana enggih berkunjung ku umah ni Rina, sebet é.
Naina mulangkah ku arah ni tingkep sire munyikep ni layar. Uren teridah nge rede, Naina berunger ku ine malé beluh ku umah ni Rina.
“Assalamualikum.”
Ucep Naina saat wé sawah i arap umah ni Rina. Rupen, umah ni Rina Murangkap urum kedé.
Ine Rina seorang pengrajin Kerawang Gayo.
“Wa’alaikumsalam…éh, Naina kupen, mayo nye Nai.”
Ucep Rina sire mumpersilahkan Naina mayo.
Rina mungajak Naina kunul i ruang tamu. I samping ni kursi, ada sara lemari kaca. I was é delé bepajang aksesoris si bertos ari sulamen Kerawang Gayo.
“Sulamen hana ni, Rin?”, kunei Naina takjub.
“Ini Kerawang Gayo.” Jeweb Rina sire munilok ku arah baju si bepajang i beden ni patung.
“Joh, cantik pedih geh.” Puji Naina. Naina namat sara upuh den mumperhatin né urum serius.
“Motif é beda-beda Rin o?”, sidik Naina.
“O, Naina. Si kubetih hé motif ni Kerawang Gayo ni mugerel, sara emun berangkat si mulambangeen kesetieen wan kalangen masyarakat Gayo, sejelen den tetap wan kesatuen.” Jelas Rina sire munilok ku sara motif wan ulen-ulen si tengah i amat Naina.
“Wah, kerén. Motif hana tebami geralé, Rin?”. Kunei Naina penasaren.
“Ara Emun Beriring, Emun Berkuné, Mata Ni Lo, Puter Tali Tige, Ranté, Saraq Opat den delé mien ya. Motif-motif oya i padunen i sara ton. Lagu upuh, kayu, atau ton si lén-lén.” Rina munilok ku beberapa gabungen motif kerawang.
Naina mungolak ni mataé.
Teku ini, wé munéngon produk-produk Kerawang Gayo. Biasaé, si éngon hanya Kerawang Gayo wan ni pengerjen. Naina mesier ni penéngon né ku sekeliling ruang tamu. Mataé teduh ku tas si sagi ni lemari.
“Wah, cantik pedi tas o, Rin!”
Rina pé langsung munuwet tas si i turuh Naina.
Rina langsung munosah tas kerawang ku sebeté ya. Naina mumanang tas orom mata é si mukekilet.
“Sidah rege nit as ni, Rina?”, sidik Naina.
“Kahé cube ku kunei ku ine o boh.” Jeweb Rina.
***
“Naina gere jajan ku kantin ke?”, kunei Rina. Gere biasa é Naina tetap i kelas pas jem istirahat.
“Enggeh.” Jeweb Naina sire mugining ulu.
“Korong pedi len aku.” Lanjut é.
“Betulle?”, sidik Rina.
“Biasa é, gere pas ko neten mulapé.”
“Betul….”, anguk Naina.
Rina murasa penasaren. Rina berusaha mumetih hana sebenar é si tengah terjadi. Bayangen tas kerawang i umah ni Rina beberapa lo ku kuduk ni terngiang-ngiang wan inget-inget é. Naina ménét pedeh mubeli tas sekulah kerawang a.
Wé memutusen untuk munabung kati pas mubeli tas kerawang oya. Naina mulei mujuel penan i lingkungen umahé. Tekad Naina kuet pedi.
“Naina, nge malé semingu ko gere bejajan, mukune?”. Kune Rina urum serius.
“Naina tengah nabung.” Kené salah satu pong é si ara wan kelas.
“Munabung kin hana?”, sidik Rina mien.
“Ara éh.”
Jeweb Naina sire mungedép ni semelah mata é.
“Naina! Enti perin ko malé mubeli tas kerawang si juel ineku?”, kune Rina penasaren.
Naina munganguk arih ulu é. “O, Rina. Ménét pedeh aku mumakék tas oya. Tapi, aku turah nabung kati genap sénné.” Jeweb Naina arih-arih.
***
Rina murasa kagum urum tekad ni sebeté. Rina ulak den muceriten kejadien si betéhé ku ine é.
“Ine, Naina o galak pedéh atéwé kin tas kerawang oya ne, sampé gere jajan wé ku kantin umah sekulah. I kenal é sén kati nguk nabung!”.
Ine Rina si mumengé cerite a murasa terharu.
“Naina betul-betul gigih, turah kite bantu wé, ipak.” Kené Ine Rina sire tersenyum.
Lang ya. Pas Naina enggéh ku umah ni Rina malé belejer, Rina nge munyiepen hadiah kin Naina.
“Naina, kejep boh,” kené Rina sire remalan serapah ku arah kamaré.
Gere lemem ari oné, Rina teridah tangkuh ari kamar urum tas kerawang si olok belangi wan kemékké.
“Nah kin ko Naina! Ari ineku,” ujer Rina urum senyum bahgie.
Naina pebening.
“Tapi…ini mal Rina! Gere pas kuterime.”
“Gere sesanah! Ini ineku munosah é. Ine terkesan urum usaha den kerja kerasmu Nai,” jelas Rina sire tersenyum.
Luh mata bahagie mujalir i pipi Naina. Naina munerima tas penosah ni Rina urum pumu mugegir. Penuh rasa syukur. “Berijin, Rina. Berijin, ine!”, kené Naina urum senyum bahagieé.
Sejak saat oya, Naina gere hanya mumiliki tas kerawang impiené. Tetapi, Naina juga munyadari arti ari persehebeten den kebaiken. Naina berjanyi untuk dor berusaha den pantang mennyerah. Kerna, impien si iperjuangen urum usaha gigih pasti akan mubuahni hasil. *[SY]*
* Khansa Syakira, lahir i Kute Takéngon, 07 Desember 2012. Anak ketulu ari opat besudere. Bersekulah i SD N 9 Lut Tawar, Takéngon. Hobi mujerang urum munawé. Cita-citaé mujadi hafizh qur’an sara saat kahé.
