[Puisi Bahasa Gayo] Ku Allah Kite Beséré
Hakimiadi Rawe
Jahat kejam gere bertanggung jeweb
Luke bise gere pas kuterime
Musibah gaéh gere terjeweb
Gere né ibetih sa malé isalahen pé
Mongot ni uten delé laohé
Lagu tensaran gere mepat arahé
Hewan tangkuh mérah mangané
Gere sadar kite oya rupen tene é
Gere né lepas bumi munangung é
Ahéré ken bele ku jema delé
Mata pencarien gere mepat néh
Umah kaul pé seba sangkané
Mupesir séba ama rum anak é
Makin ine é tah isi parie
Ujien ni Tuhen tepat gaé é
Cumen sa keta pelaku é
Jelen kolak nume né dené
Totor naru nume lintes né
Tar arul seba lengkok é
Kerna mulapé seba anak é
Pemerintah nuruh jabatenné
Kuso ku ini tetah caraé
Séba ikhlas ari até wé
Séba mien kam menilai é
Bencana ni kul kasé imbelné
Cumen turah seber kite béwéné
Ku Allah keta kite séré pé
Katinti kin uwes ni até [SY]
Arul kumer, Des 2025
