Salsabila Ramadany
Geralku Salsabila, kené jema belangi ni rupe ku, i turunen ari ine. Bedenku atas urum kulit kuning langsat si turun ni ama ku aku. Aku jema é ceria dan selalu bersemangat, walau statusku sebagé anak mérék. Kami sekeluarga berasal ari Jejem.
Keseharienku i pong ni roa sebet ku si jeroh prasat urum belangi ni rupe. Kami berasal ari kampung si berbeda-beda. Nadiya ari Wih Terjun dan sarami Rembulan berasal ari Kampung Merah Mege. Dan kami saat ini berumah i Kampung Jejem.
Saat musim ilang wah ni kupi, kami murasa bahagie. Kerna, wan musim ini le kami pas mungenal sén kin tamah ni jajan urum mubeli keperluen si len é.
Terlo sabtu ini, kami berencana beloh mangan ongkosen ku empus kupi ni sudere ni kami si berlokasi i Gayo Murni Kecamatan Pegasing.
Walau terhitung sara kecamatan ilen, tempat é gip ari kampung ku. Untuk munuju ku tempat ni kami mungenal rezeki, biasa é kami i rai urum empu ni empus den munginep i tempat panen kupi.
Sebelum beloh kami perlu munyiepen barang-barang untuk beberapa lo munginep. Lagu baju ku empus, baju ganti, sarung pumu, upuh jebel, termos ni wih, kantong kupi, baju semiang, buku pelejeren, urum radio kucak.
Pas aku tengah munyiepni barang-barang, Nadiya urum Rembulan nge besesuk i kuduk ku.
“Ara ke nemah radio ko pong, berhubung lokasi nte i atas ni bur jadi kite butuh hiburan den gere nguk sampé taring berita terkini.” Kune Nadiya mugintes naku.
“Yoh, nos gintes pong nipé way. Ara ni radio é. Kubetih ko ike malé nomé turah mumengé jema bejangin mulo den wet nomé turah mengé berita, lagu bapak-bapak pas pedéh.” Jewebku sire tersenyum dan munutup tas si malé ku mah ku lokasi panen kupi.
“Cuaca olok pedéh sejuk ni Lan, ara ke mah upuh jebel? Aku gere mera ike mai jema kite ngutip mien ko tumbang?”. Ejek Nadya ku Rembulan.
“Berijin le ya éh nge macik até ni kam kin nong. Kam tenang, tulu pé kedang upuh jebel si kumah ni. Terasi urum gulé masin pé ku mah kati dor tamah kite mangan.” Lanjut é sire munéjék Nadiya. Gere lemem, motor Pak Yuda pemilik ni empus pe sawah, kami urum sigap é langsung mayo munemah barang nemah ni kami.
“Jah…kerén di motor ni bapak ni geh, motor jeep. Seru perjelenen te ni nampak e.” Kenaku besisu ku roa sebetku. Terih sampé i pengé urum Pak Yuda si nge mayo ku motor dan teridah nge siep munancap gas ku lokasi pegunungen Jagong.
Jarak ari kampung ku empus terhitung roa jem kurang lebih. Melewati wih kul, uten del, urum penangkoken serta jelen si betikung-tikung. Betul-betul turah sepir handal si munemah motor ku lokasi empus ni.
***
Sesawah é i lokasi, pak Yuda mumersilahnen kami mayo ku jamur empus, setelah memberitahu titk-titik ni umah pak Yuda langsung munaringen kami untuk beristirahat den lanjut beraktivitas soboh lang. Jamur inilah ton ni kami taring selama panen kupi.
Jamur si tos ari kayu ni sangat aman den nyaman untuk kami singahi beberapa lo ku arap. Bahkan jamur empusni lebih jeroh bangunen é daripada umah ni kami i kampung. Aku suka kin bangunen urum pemanangen arap ni jamur ni, si langsung tertuju ku bur urum empus kupi ni jema.
“Joh…kamar mandi ni umah teni i deret boh. Jadi aktivitas kamar mandi te turah tangkuh berarti.” Kené Rembulan pas muninget ling ni pak Yuda.
“Berarti kelem pé ike malé ku kamar mandi turah tangkuh o?”. Saut Nadiya urum nada macik.
Aku pura-pura gere mumengé debat ni kedue pongku sire mubersih ton nomé dan barang-barang ni kami.
“Nge ya, dalih oya si macik ki. Nguken éngon hana si ara i dapur o?”. Kenaku setelah kupengé engih ara né perdebaten antara roan né.
Setelah jamur ni kami teridah bersih, kami berusaha mungenal utem i sekitar ni empus kin bahan bakar penjerangen ni kami kahé. Jamur empus ni memiliki listrik urum penjerang ni kero.
Kin wih minum den pong kero turah i jerang i dapur pakék utem. Iyo lao nge teridah, kami sengeje gere mu mulon ngutip kupi. Selain cuaca teridah reduk dan lo senye nge i arap ni mata, kami mumutusen untuk mungutip soboh lang. Kami munikmati senye lao urum seduhen kupi i teraas ni jamur.
Soboh lao pé munyapa urum nami i kiding emun i batang. Kami si nge beberapa menit munyusuri empus teridah wah ni kupi si nge ilang olok mukekilet. Gere seber néh rasa é munengkip ni kantong si kami selempang i kerlang, den mungumpul né ku karung si nge i siep ni pak Yuda.
Ike nge siep mungutip, kupi pé i jule ku toké si malé mubeli kupi pengutip ni kami. Bayaren kin pengutip lagu kami sesuai urum jumlah takaren per tém atau sepuluh aré ari hasil si nge i kutip. Atau, sesuai urum timangen ni barang, si i pakék urum beberapa toké den lokasi.
Saat ini ongkos ni pengutip i hitung sara tém Rp. 30.000. Pengutépenku wan serlo si ku sangup sekiter opat sampé onom tém. Sedangkan Rembulan urum Nadiya pas mulebihi kemampuenku dalam mungotip.
Sire jelen ulak kami munyempaten munangkap pucuk jepang urum uwah ni jepang si mȯrip sepanjang dené munuju jamur perempusen. Teridah i empus ni tetangga awal tasak wan mata ni kami. Setelah muniro izin ari empu ni empus, tanpa delé berkekire, kami pé munebang batang ni awal si nge tasak.
Pucuk jepang kami tumis urum pong kero gulé masin goreng. Urum sedep pé kami mangan sampé piring gelus, selaén mulapé jantar si kami jerang yoni terasa sedep i pangan. Mari mangan urum semiang maghrib kami kunul sire becerite sampé gere sadar bahwa lo nge gelep. Tanpa i undang temunuh enggéh mungucepni salam, aku, Nadiya, Rembulan mumutusen untuk nomé urum alunen lagu ari radio.
Aku jege wan tengah kelem bute. Macik ni aténgku pé terjadi, panggilen alam si gere pas i tulak. Gere berani rasa é ike aku tangkuh seseréng. Akhir é kurungui pongku Rembulan, “Rembulan pong ngen aku ku kamar mandi yoh.”
Rembulan gere mugerak tikik pé, aku berpaling untuk murungu Nadiya.
“Nadiya pong ngen aku ku kamar mandi yoh.”
Akhir é Nadiya jege urum ling ku si betul-betul tengah perlu kin bantuen né.
Tapi Nadiya murasa gere berani jugak ike reroan kami we beloh ku kamar mandi. Kami murungu Rembulan untuk beluh juga ku kamar mandi. Untung é nyawa ni Rembulan mubetih situasi, kami remalan tangkuh ari jamur ku kamar mandi urum lampu ni senter hp.
Aman, gere ara hal-hal si terjadi lagu wan bayangen ni kami. Setelah siep kami mayo dan langsung mungunci jamur. Kami mulanjut mienné nomé sampée tepengé tures wan kemiring adzan berkumandang ari radio.
Kami urum bibes é wet mujerang kin mangan soboh urum ruhul.
Sebelum berangkat ku empus kami munemah kupi wan termos urum awal mengkal si kami rebus kin jengo.
“Awal rebus urum wih minum te kahé nge ke pong?”, aku mungune ku Rembulan.
“Nge tuan putri.” Jeweb é.
Sebelum bebuet kami betetah kin mungutip kupi. Baju tempur nge beseluk, kantong kupi nge beselempang i kerlang, urum sarung pumu nge be pasang jeroh i ton é. Sesire bejangin kami remalan munuju empus si berkiser 10 meter ari jamur.
Dum senangé kurasa wah ni kupi nge méh ilang warna é sampék kantong ton ku munama kupi nge engkip. Nadiya serloni olok rajin mungutip, nong sara tém ilen niwe nge roa tém. Beda urum Rembulan, si serlo ini sibuk urum hp. Ni kami nge depet pepien tém niwé setengah kantong ilen.
Nge saat é kami mungutip ari arah timur empus, tepengé ku keméréng leng ni jema si tengah becerite i sekiter ni empus. Kami jadi penasaren, sahen pelin jema si ara wan empus ni?
Ternyata pak Yuda munemah pong kin mungutip kupi i aréa semelah kuen ni kami. Pong pak Yuda rupe né masyarakat sekiter si taring i kampung ini. Jadi, pakéa gere munginap. Hanya kami si munginap isien. Empus ni terhitung lues jadi butuh delé jema ken mungutip kupi é.
Setelah istirahat mangan dan semiang dzuhur, kami pé ulak ku barisen masing-masing. Tapi, Rembulan teridah nge nomé i sagi ni jamur. Pas i rungu Rembulan tetap enggih mera wet. Jadi, kami taringen seseréng é.
Setelah beberapa menit, kami lanjut mungutip. Rembulan enggéh dan bengis-bengis karena gere kami rungu. Kami munutup kemereng ari Rembulan si tengah pubebengis. Setelah murasa hék bengis, Rembulan mulanjut ni pengutépen kupi é den kembali tersenyum sire muniro maaf.
Matalo teridah beséré ku arah barat. Iyo lao munyambut kami si tengah remalan ulak ku jamur. Lagu naru ni dené cerite ni kami iyo ni.
“Delé nen pengutipen mu Nadiya daripada nong ni. Ni Rembulan o keta tikik. Tapi, sén né kenak é delé.” Kenaku sire kedik mugagak.
“Alhamdulillah nong opat tém, Nadiya onom tém, den Rembulan sara tém setengah we. Aa sana néh, kaya kite.” Lanjut ku i beles kedik ari Rembulan urum Nadiya.
Gere terasa nge semingu kami munginep i jamur si lagu umah ni pak Yuda. Panén kupi pé nge siep, waktu é kami ulak ku Kampung Jejem. Liburen sekulah pé nge malé siep. Waktu é kami turah muberesni keperluen sekulah. Aku bersyukur kerna mudepet delé hasil ari mangan ongkosen ngutip kupi se séni.
“Semoga sén si nge kudepet ni nguk munupang biaya akhir sekulah den semoga nguk kin tabungen ku untuk mulanjut ni sekulah SMA.” Kenaku wan naté.
‘Andai ama den ine ara ilen. Ya Allah lapang ni Allah kuburen ni jema tuengku. Berijin atas rahmat dan karunia-Mu sampé detik ini ya Allah.’[SY]
Takéngon, Oktober 2024
*Penulis begeral Salsabila Ramadany. Lahir i Takéngon tanggal 09 September 2009. Anak si ulu bere ari 2 bersedere. Hobie bernyanyi si iwarisen ari ineé si penyanyi. Séni wé sekulah i SMPN 31 Takéngon.
