[Puisi Bahasa Gayo] Kayu Teger Mulenó Rupen
Hakimadi
Hejeb gere mutungkelen
Gere mepat sa kusa ikadunen
Jeroh te pé, élét we rupen
Koték we si iceraken
Kutetatah jelen penuripen
Kin penayah gere we rupen
Mupisah turah lelah ni jelen
Asal nge retak osop petemun
Kuceriten ku kiri kuen
Salah i aku kené serinen
Asal nge beta retak ni beden
Gere pengén jema si kuceraken
Buah hati munemah teger
Bier musier puló harapen
Kadang semelah aku berketier
Gere tergangu naku pikiren
Waih tenang nge méh keruh
Gere tebuh kupanang rupe
Waih jernih enge muselmuh
Kemuh rasa rembege
Kayu teger mulenó rupen
Ampung puló cimó méh beden
Kering waih telege tetibuken
Taring cerite nami ni emun [SY]
Arul Kumer, Januari 2025