Laila Wannara
Kuyu beremus lemut ari deret ni tingkep kamarku.
Geralku Laila aku beberu si berumur 13 tun si taring i Rime Raya dekat Bénténg bersejarah Tenge Besi.
Iyo si terang oya aku munérah le kendaraen si lalu lalang i sekiter Benteng nye rasa pembetehenku pé geh.
Kawasen Tenge Besi oyale jelen lintes nasional si ara i Kecamaten Gajah Putih Kabupaten Bener Meriah. I kawasen oya batang-batang ni kayu tengah rubu alami serta udaraé lagu noya segaré.
Sementara teridah sara pemanangen si gere sedep i éngon urum kasat mata i sagi ni arul oyalé sampah bertekaren ari gip lagu wih terjun.
Kawasen Tenge Besi termasuk uten rugup si alami ilen den ara rak wih kul iton oya. Silagu noya sejuk nan asri wajib iperala kati keasrien né tetap terjege penasaren aku munalu ineng ku.
“Ine, ine isi? aku munalu ine.
Aku mudepeti inengku tengah mujerang jantar.
“Mukune nak ku”?. Kune inengku seger mumipis cecah.
“Mukune lé kendaraan si liwet i kawasen Bénténg
Tenge Besi ni ine? “. Pengunenku penasaren.
“Oh oya kerna Bénténg Tenge Besi munaso delé cerite sejerah é si naru”
***
Aku ulak mien ku kamar. Lang aku malé munéngon Bénténg Tenge Besi urum sepoi-sepoi kuyu iyo si sejuk. I pongen cico manuk si lungun rasa kenak betih i wan aténgku.
Lang waktu beloh sekulah, pelejeren si kami jeleni araleh tentang sejarah.
Méh oya bél meling. Kami béwéné mayo ku kelas.
“Bu… “, perinku urum munatangngen pumu.
“Ya.. ara pertanyaen ananda?”. Kunei bu Arina guru sejarah kami.
“Bu, aku ménét mubetih kune sejarah Bénténg Tenge Besi?”
“Boh ibu malé muceritenen tikik tentang sejarah Tenge Besi. Béwéné mera mumengé?”. Kunei bu Arina.
“Meraaa bu.” Jeweb ni kami béwéné.
“Munurut cerite waktu tun 1902 pasuken Belene i hadang urum para ulama i kawasen Tenge Besi, waktu oya pecah pertempuran si sengit. Antara pejuang kemerdekaen urum pasuken Belene. Peperangen oya delé pedéh mumangan korban.” Jelas ni bu Arina.
“Sidah jema si benasa bu?”. Pengunenku penasaren.
“Lime jema ari para ulama oya syahid i kuburen i daérah, ari kelime kuburen na ara si bertulésén Reje Agam Aman Beramal. Reje Bukit panglime perang kandang a gugur tun 1901/1902″
“Wah gigih pedéh para pejuang kemerdekaen na mulewen penjajah a bu.” Perin Yanto semangat.
“O betul, lalu kuburen kelime ulama a i perin kuburen ulama Tenge Besi. Sampé serloni kuburen na tetap ijege rum jema si berziarah kuné.” Terang ni bu guru mienné.
“Isi ton kuburen ne bu?” kune Yanto mien.
Kuburen ulama Tenge Besi bertepaten i Kampung Persiepen Sentosa (pemekaren Kampung Reronga) Kecamaten Gajah Putih, Kabupaten Bener Meriah”
Jep peceraken si i ucapen bu Arina lagu munemah aku ulak ku masa jemen mubayangen kune Bénténg oya sesuk gagah den mujadi saksi bisu perjuangen para pahlawan.
Saat bél ulak sekulah muling, aku remalan ulak, mulintesi Bénténg Tenge Besi. Urum jep langkah aku mubayangen penjelasen guruku rum memanangi Bénténg si megah a.
Kuyu beremus mupongni perjelen, munemah rasa terharu urum bahagie berkat perjuangen pahlawan si nge berjuang kin negeri ni. Nge sawah i iumah aku renyel munuke buku harien nye munolis tentang pengalamen ku serloni.
Delé pedéh pelejeren si nguk ku petik. Urum semangat, aku munolis sé rapi. Séni, aku nguk mubetih sejarah Bénténg Tenge Besi si selama ini rap urum umahku i jelan Bireuen Takéngen Reronga, Kecamaten Gajah Putih Kabupaten Bener Meriah Provinsi Aceh.
Iyoni aku murasa seolah ara hubungen si lebih relem urum ton taring den sejarah sekiterku. Aku pé mubayangen sara lao kasé aku nguk mubagi cerite ini ku pong-pong ku si lén.
Aku akan mumeden jema kin muhergei warisen-warisen budaya si ara. Urum cara ini, aku berharap nguk munos jema juge murasa nen kebanggaen si dis terhedep sejarah si nge mubentuk identitaste. [SY]
Reronga, Oktober 2024
*Laila Wannara, lahir i Ronga Ronga, 26 Januari 2024. Anak sulubere ari roa bersudere. Laila séni kelas 1 i SMP Negeri 1 Timang Gajah. Hobié nyanyi rum menulis. Cita-citaé kin dokter. Warna kesukaanné baby blue. Ike malé menghubungi Laila melalui emailé i lailatkn@gmail.com