Balqis Aribayo
Kampung Sepang sobohni teridah jeroh olok, mun turun mujadi nami, bur ijo lues mudenang. Kampung Sepang pemekaren ari Kampung Penampaan mulei taun 2000. I Kampung Sepang ara roa dusun, Dusun Sena den Dusun Sepakat.
Masyarakat i kampung si kedelénné berume, urum berempus. Setiep soboh méhné nge siep-siep malé beluh ku empus, ku ladang, den ku ume.
I Sepang ara aih kul, geralé aih Sepang. Aih kulni mulei ari Karang Anyar nye lewati Kampung Palok, Penggalangan, Lempuh, Cempa, Gele, Sepang, sawah ku Telpi. Aihé jernih, deras.
I kuen kiri ni aihni mȯrip kayu rimun, delé manuk simucico. I aih kulni delé macam atué, ara atu kul, kersik kasar, kersik alus. Singuk igunen kin nos umah ni masyarakat Sepangni.
Besilo, i Kampung Sepang musim peruren. Bierpé musim peruren, kekanak i Sepang dor gure rasaé niri i aih kul.
Sobohni, aku nge bejanyi urum pong-pongku malé niri ku aih kul.
“Paké, ngeke mahkam alat nirimé?”. Kunei Rasyifa ku aku.
“Nge!” Kenaku. Hanah pelin singe mahko?”. Kunei Rasyifa.
“Émér, tibok, sabun niri, sampo”, nye Rasyifa turuhné nemahé.
“Ino…gi kinget mah bros nupuhni.” Aku gintes. Pedehal hatné nyaksi nge kubun ku wasni émér. Jeweb Rasyifa.
“Ngeya, kahé pakék broskuni dih.” Kenaku. Urum-urum kamipé nye ralan ku aih kul ho.
***
Sawah kaih ho, matanlo nge mulei nik, ara pepien jema dang niri i aih kul ho, den ara ine-ine, akak-akak sitengah nesah i atas ni atu kul tepi naihé.
“Rasyifa, i ujung ho dihné kite bun émérteni.” Kenaku, sire kutilok ku tepi nai ho.
“Entah”. Kené Rasyifa, sire nralan ku ton si ku turuhenne.
Nge sawah i tepi nai ho, kami rerenemle kiding kami. Dum sejuk ni aihé nge ijo kiding ni kami. Isiremné le aih ku aku, nge besé kubeles mien. Kamipé kedik mukakak.
Arih-arih kamipé mulangkahku lah ni aihé, aihépé deras olok, Rasyifa langsung nlumpet sire nawé. Akupé mulei nawé. Urang kampung sepang nge pané nawé, nge iejeri ari ucakmi.
Kami nawé ku ken ku toa. Delé kekanak bek kami urum nawé. Seseger, kamipé belélon tekas sabun ku aihé, ha sipaling tir, ndepet ni sabun, wéle pemenangé.
“Hié, nong nge depet.” Kené Rasyifa, waktu wé nangkap sabun, si tekarni Oca.
“Horééé, naku pé depet.” Kujeweb. Kami urum-urum ndepet sara batang sabun, kami kamulen, nye kami kersatan ku atu si nge mulumut.
Urenpé mulei turun rintik-rintik, waktu kami belélon tekar sabun. Mun item singe mujadi kedut, nge mubah njadi uren badé. Ocar akanku si bedenné kurus makati kami mérah iken ili. Waktu uren badé, waktu si cocok nggerguh, aihé keruh, i onelé iken pé temas ngonaié dang ngkamul i tuyuh ni atu kul.
Iken ilini iken si nge ara mokot, ari jehmenmi, ara sarami iken keperas. Ike iken ili warnaé item, abul-abul pora. Iken keperas, mpenutih, rum item. Narué sekiter lime sawah sepuluh senti. Iken ili gere mukisip, limuswe. Ike iken kepras, mukisip alus. Masyarakat i Kampung Sepang nge biese ngerguh, ngegé é waktu aih ucak kin itak serlo.
“Ini, ara kumah tulu durung kin ngerguhné”.
Kené Oca sire nosan sara durung betangké katu ku aku.
“Ne, berijin Oca.” Kuucepen, sire nerime durungé. Ku Rasyfa pé osahé sara durung.
“Ntah kite ndurung (nggerguh) ku ho.” Kune Rasyifa sire nuruhni atu kul. Bieseé, iken ili menep i tuyuh ni atu kul.
“Ntah”. Kené kami serentak.
Arih-arih, kami nralan ku atukul i lah ni aih. Bierpé aihé kul, deras gere mungurangi semangat ni kami. Oca mulei ngerguh ku arah kuen, den aku i semelah kirié. Renye, kami rodoken ku tuyuh ni atu kul, semelah ni kidingku, kukertaman kersik kati ikenné pé kederet.
“Aku depet iken ili.” Kené Oca sire mutauk. I tatangné durungne. Delé iken ili si mayo koasni durung. Oca, mulei nrodok ku arahni Rasyfa. Gere bececerak, Rasyfa langsungnye nengkam iken ili si ara i durung ni Oca, bun né le ku iwen berikot ku awaké. Iwen ni, sengeje i tos kin ton iken si ngona.
“Horééé!”. Taukku, gureééé. Waktu kutatangen durung kue. Ara pepien iken ili ukuren sedang ngelepas. Kujurahan durung ku Rasyfa. Urum serapah, Rasyfa bun Rasyfa iken singe kona ku iwen né. Nge besé, kami perahlenné iken ili ku son-son nan. Iwen si awakni Rasyfa ne nge mulai teridah engkip. Oca nluncet ku atul kul siwarna item, kutunung wé.
“Awww.”
Taukni Rasyfa, kidingé njoros waktu malé nlewati atu ucak. Bedenné nggergum ku aih kul. Ara pepien iken ili nluah kaihé.
“Kini…, Ku tulung.” Kujurahan pumuku ku Rasyfa, kati nguke uet sesuk. Gere jewebepé, langsung nye yatné pumuku nye sesuk.
“Ne, ikenné nge luah.” Kené urum até sedih.
“Gerengkunah.” Kenaku, rum Oca serentak. Gere ilen rejekite. Ntah, kite perahlén. “Kungeren kati semangat.”
“Anca oyabele, delélen atu sigilen kite ngerguhi” Kené Oca, sire tuhné atu silainné.
Rasyfa pé, peanguk-anguk, sire njém. Yoépé, kami lanyut mérah iken. Aih Sepang memang temas nérah iken, atepé senang rum bahagie.[SY]
* Balqis Aribayo, lahir di Medan, tanggal 8 April 2014, bersekolah i SD Negeri 2 Percontohan Blangkejeren. Hobi renang dan membaca. Bercita-cita menjadi seorang dokter ahli.