[Puisi Bahasa Gayo] Kunede Akhéré
Hamdani
Mongot kenaké muderu
Sebuku ari wan ni até
Sayangdi kao Gayoku
Basamu male-malé bené
Emas urum pirak gerené sejudu
Gerené mutentu si pantas i dené
Resam sedenge nge taring geralmu
Edet ni datu enge ceré beré
Amat ni empap nge oloktu eking
Kerpé pé kering empap pé maté
Mupépét tau si kerna uwing
Sampah pé taring nge bené lungié
Gerené ara si munutu temping
Laing si loting gerené ipenge
Besilo nge langka beberu munenting
Tingkah teganing aku mukalé
Besilo cerak gerené berules
Peri berkies gere naé pané
Ama urum ini le atéwé uwes
Gere berbeles kin budi jasaé
Rasa ni empan memakin kebes
Nge makin tures ike pait ni ungké
Téngkéh berungké memakin rumpes
Olok nge ubes si nosah rempelé
“Enta kune enta kune
Lagu si enge eméh bené”
Beberu jemen beluh munuling
Sedep itéméng mah galak ni até
Nge makin lungun tingkah ni suling
Nge makin nyaring laing ni seruné
Nge mujerilep le cucuk ni sunting
Nge osop pating urum tekan kune
Bené pingang sérung si berawak linting
Toping iling iling nge taring geral lé
Dunie maju enge bené sumang
Kasih semayang osop lah ni dené
Taon mulie malé taring ruang
Serasa bimang penyakit ni até
Belangi langit wan porak mudetang
Mampat ni bintang kin paong nomé
Muoinah benyer mesot ni pempang
Belide perentang kedik mudaté
Tinen betinen tumpuk ni dosa
Musarik donya leta ni penané
Iisik ni enyas gaéh ni sela
Nge empot Rara ebem peserme
Temet beserét ikot ni kekata
Oya kati nyanya nge mugeral lie
Betul ni muripte nge mudaka
Budi urum basa wa kenah ku até
“Enta kune enta kune
Lagu si nge eméh bené”
Mongot kenaké muderu
Sebuku aku gere pane [SY]
Redlong Bener Meriah
*Puisi di atas diangkat dari syair Didong tepok dan lagu pop Gayo.
