[Puisi Bahasa Gayo] Jempung
Salman Yoga S
Kuséyut bang jempung
Kati mukepung asap seringkel kampung
Kututung bang sesongkoten kati pesam beden
Kuséyut bang jempung
Kati mukepung asap seringkel kampung
Kutingkah bang teganing kati tenengé ku kemiring
Heyy kusarang bang item ni emun
Kati sidang bang tetép terȯtȯ ni uren
Ini doa-doa ari tempéh-tempéh berbebelén
Ini kesah-kesah ari belat-belat ni radén
Ara si mukipes tudung ari serap ni peruluken
Bertudung ilang bersedep mulengkung
Woy jema si miyo
Ara ke mutumpit mugerésék peték
Woy jema si miyo
Ara ke die getih tetakut wan batang
Kuséyut jempung asap mukepung
Seringkel kampung mununung buet murum
Heyy sibetudung putih mukipes ari peruluken
Kao ke die si nos gelana
Kao ke die si mujule jengo berkupi item berongol-ongol
Bergutel del berlepat bungkus ulung
Kuséyut bang jempung
Asap mukepung seringkel kampung
Mununung wan didong gelung
Taman Inen Mayak Teri-Takéngen, 9 Juni 2023
*Dibacakan improvisasi dalam Festival Kopi Gayo Didong Runcang di Taman Inen Mayak Teri, Takengon, 9 Juni 2023.
